जेनेभा – संयुक्त राष्ट्रसङ्घले गाजामा चङ्गा, ड्रोन र बेलुन उडाइएको क्षेत्रका बासिन्दालाई हटाउने इजरायलको धम्कीलाई ‘अत्यन्त आपत्तिजनक’ भन्दै कडा आलोचना गरेको छ ।

राष्ट्रसङ्घको मानवअधिकार कार्यालयकी प्रवक्ता रविना शमदासानीले मंगलबार जेनेभामा आयोजित पत्रकार सम्मेलनमा बालबालिकाले चङ्गा उडाएको आधारमा उनीहरूलाई क्षेत्रबाट हटाउने धम्की अस्वीकार्य भएको बताइन् ।

“बालबालिकाले चङ्गा उडाएको कारण धपाउने धम्की अत्यन्त आपत्तिजनक कुरा हो,” उनले भनिन् ।

इजरायलले आइतबार गाजाबाट इजरायली क्षेत्रमा चङ्गा, ड्रोन र बेलुन उडाउने गतिविधि नरोकिए सैन्य कारबाही तीव्र पार्ने चेतावनी हमासलाई दिएको थियो। इजरायली प्रधानमन्त्री बेन्जामिन नेतान्याहु र रक्षामन्त्री इजरायल काट्जले संयुक्त विज्ञप्ति जारी गर्दै त्यस्ता गतिविधिमा संलग्न व्यक्तिविरुद्ध कारबाही गर्ने र गतिविधि हुने क्षेत्रका बासिन्दालाई समेत हटाउने चेतावनी दिएका थिए ।

पछिल्ला दिनमा गाजा सीमावर्ती क्षेत्रमा चङ्गा उडाउने घटना बढेको इजरायली सञ्चारमाध्यमले जनाएका छन् । शनिबार सीमावर्ती बस्तीमा चारवटा चङ्गा फेला परेको र आइतबार इजरायली सेनाले एउटा चङ्गा खसालेको बताइएको छ। पछिल्ला केही दिनमा फेला परेका चङ्गाको सङ्ख्या करिब १० पुगेको इजरायली सञ्चारमाध्यमले उल्लेख गरेका छन् ।

यी घटनाले विगतमा गाजाबाट इजरायलतर्फ आगो लगाउने उद्देश्यले उडाइएका चङ्गा र बेलुनको घटनालाई पुनः स्मरण गराएको छ। त्यस्ता चङ्गा र बेलुनका कारण दक्षिणी इजरायलका कृषि क्षेत्रमा आगलागी हुने गरेको थियो ।

इजरायली अधिकारीहरूले पछिल्ला घटनामा हमासको संलग्नता हुन सक्ने आशङ्का गरेका छन् । यद्यपि ती चङ्गामा विस्फोटक पदार्थ नभएको र सम्भवतः इजरायलको प्रतिक्रिया परीक्षण गर्ने उद्देश्यले गतिविधि गरिएको हुन सक्ने इजरायली सञ्चारमाध्यमले जनाएका छन्। हमासले भने चङ्गा उडाउने घटनामा आफ्नो संलग्नता अस्वीकार गरेको छ ।

हमासको राजनीतिक ब्युरोका सदस्य बासेम नाइमले भग्नावशेषबीच बालबालिकाले आफ्नो निर्दोष बाल्यकाल खोजिरहेको भन्दै उनीहरूले चङ्गा उडाएको दाबी गरेका छन् ।

हमासले आइतबार मध्य गाजामा भएको इजरायली हवाई आक्रमणलाई समेत चङ्गा उडाइएको घटनासँग जोडेको छ। गाजाको नागरिक सुरक्षा उद्धार सेवाका अनुसार उक्त आक्रमणमा तीन जनाको मृत्यु भएको थियो ।

राष्ट्रसङ्घकी प्रवक्ता शमदासानीले इजरायलको पछिल्लो चेतावनी उच्च तहका अधिकारीबाट आएका आपत्तिजनक अभिव्यक्तिको शृङ्खलामध्येको पछिल्लो भएको बताइन् ।

उनले यस्ता अभिव्यक्तिले अन्तर्राष्ट्रिय मानवअधिकार तथा मानवीय कानुनप्रति गम्भीर अनादर देखाउने र थप हिंसा बढाउने जोखिम रहेको चेतावनी दिइन् ।