काठमाडौं– राष्ट्रिय स्वतन्त्र पार्टीकी सांसद् टीका संग्रौला अछामको मेल्लेख गाउँपालिका–६ सोडसा कालापातालका दीपक बोहराको मलेसियामा सडक दुर्घटनामा परी मृत्यु भएपछि उनको शव यथाशीघ्र नेपाल ल्याउन सरकारसँग माग गरेकी छन् ।

प्रतिनिधिसभाको बैठकमा बोल्दै सांसद सङ्ग्रौलाले बोहरा केही समयअघि रोजगारीका लागि मलेसिया गएका र करिब एक साताअघि भएको भयङ्कर सडक दुर्घटनामा गम्भीर घाइते भई उपचारका क्रममा सोमबार बिहान मृत्यु भएको बताइन्  ।

उनले भनिन्, ‘मृतकका आमाबुबा छोराको शव नेपाल ल्याइदिने प्रतीक्षामा छन् । परिवारले अन्तिम संस्कारका लागि भए पनि शव नेपाल ल्याइदिन आग्रह गरिरहेका छन् ।’

कम्पनीले शव नेपालसम्म ल्याउने प्रतिबद्धता जनाएको भए पनि प्रक्रिया छिटो सम्पन्न गर्न परराष्ट्र मन्त्रालय, मलेसियास्थित नेपाली दूतावास र सम्बन्धित निकायबीच आवश्यक समन्वय गर्नुपर्ने उनले बताइन् ।

सांसद सङ्ग्रौलाले मृतक बोहराको शव यथाशीघ्र नेपाल ल्याई परिवारलाई हस्तान्तरण गर्ने व्यवस्था मिलाउन सभामुखमार्फत नेपाल सरकारसँग आग्रह गरिन् ।