काठमाडौं – गृहमन्त्री सुधन गुरुङले तीन वर्षीया गरिमा चौधरीमाथि भएको जघन्य अपराधमा संलग्न दोषीलाई कानुनबमोजिम अधिकतम कारबाही गरिने प्रतिबद्धता व्यक्त गरेका छन् ।

गृहमन्त्री गुरुङले सामाजिक सञ्जालमार्फत जघन्य अपराध नियन्त्रणका लागि बलियो कानुनी तथा संस्थागत व्यवस्था निर्माण गर्न सरकार प्रतिबद्ध रहेको बताएका हुन्। उनले घटनाले आफूलाई अत्यन्त दुःखी बनाएको उल्लेख गर्दै पीडितले अधिकतम न्याय पाउने गरी सरकार अघि बढिरहेको बताएका छन् ।

उनका अनुसार घटनामा संलग्न आरोपितहरूलाई तत्काल पक्राउ गरी अनुसन्धान प्रक्रिया अघि बढाइएको छ। अनुसन्धानलाई निष्पक्ष र प्रभावकारी रूपमा अघि बढाउँदै दोषीलाई कानुनी दायरामा ल्याउने सरकारको प्रतिबद्धता रहेको उनले स्पष्ट पारेका छन्।

गृहमन्त्री गुरुङले घटनाको प्रारम्भिक चरणमा प्रहरीबाट लापरबाही भएको भन्ने प्रश्नसमेत उठेकाले सम्बन्धित प्रहरी अधिकारीमाथि छानबिन तथा आवश्यक कारबाहीको प्रक्रिया अघि बढाइएको जानकारी दिएका छन्।

“हाम्रो लक्ष्य एउटा घटनामा दोषीलाई सजाय दिलाउनुमा मात्र सीमित छैन। हाम्रा छोरीहरू डराएर होइन, सुरक्षित भएर बाँच्न सक्ने समाज निर्माण गर्नु हो,” उनले भनेका छन्।

विगतका अनुभव र कमजोरीबाट पाठ सिक्दै यस्ता जघन्य अपराध दोहोरिन नदिन कानुनी तथा संस्थागत सुधारलाई प्राथमिकता दिने सरकारको तयारी रहेको उनको भनाइ छ।