मुस्ताङ- शुक्रबार रातिदेखि परेको वर्षासँगै लेदोसहितको पहिरो खसेर अवरुद्ध बनेको बेनी–जोमसोम सडकअन्तर्गत म्याग्दी–सिरुवारी खण्ड र सुकेबगर क्षेत्रमा यातायात सञ्चालनमा आएको छ।

वर्षासँगै लेदो र पहिरो खसेपछि सडक अवरुद्ध बनेको थियो। कालिगण्डकी करिडोरअन्तर्गत बेनी–जोमसोम–कोरला सडक आयोजना कार्यालयको पहलमा पहिरो पन्छाएर आज बिहानदेखि सडक एकतर्फी रूपमा सञ्चालनमा ल्याइएको हो।

आयोजना प्रमुख तेजस्वी शर्माले करिब दुई घण्टाअघि पहिरो पन्छाएर सडक सञ्चालनमा ल्याइएको जानकारी दिए। उनका अनुसार अहिले सडकमा आवागमन गर्न कुनै समस्या छैन।

विभिन्न सञ्चारमाध्यममा अझै पनि बेनी–जोमसोम सडक अवरुद्ध रहेको समाचार प्रकाशित भइरहेको भन्दै शर्माले त्यस्ता भ्रामक सूचनामा विश्वास नगर्न यात्रुहरूलाई आग्रह गरे।

वर्षाका कारण पहाडी तथा हिमाली क्षेत्रमा पहिरोको जोखिम कायमै रहेकाले यात्रुहरूलाई यात्रा गर्दा सावधानी अपनाउन पनि सडक आयोजनाले आग्रह गरेको छ।