काठमाडौं- काठमाडौं उपत्यकाको फोहरमैला व्यवस्थापनसम्बन्धी छलफलमा चर्काचर्की भएको छ । छलफलमा जनप्रतिनिधिहरुसँग धादिङ १ बाट निर्वाचित सांसद आशिका तामाङको चर्काचर्की परेको हो ।

सिंहदरबारस्थित पूर्वाधार विकास मन्त्रालयमा भएको छलफलमा ललितपुर महानगरपालिकाका मेयर चिरिबाबु महर्जन बोल्दै गर्दा आशिका एक्कासी फायर भएकी हुन् ।

छलफलमा चिरिबाबु महर्जनले ‘त्यतिकै बेस्सरी कराएर हुन्छ, मेयरसापहरुलाई गाली गरेर हुन्छ ?’ भनेका थिए । छेवैमा बसेकी काठमाडौं महानगरपालिकाकी कार्यवाहक मेयर सुनिता डंगोल भने चुपचाप रहन्छिन् ।

त्यसपछि आशिकाले सोध्छिन्, ‘आउनु पर्‍यो नि त ।’

चिरिबाबु भन्छन्- ‘आउँदै हुनुहुन्छ त, तपाईंको कुरा आक्रामक छ । त्यस्तो कुरा हुँदैन ।’

त्यसपछि आशिका फायर हुन्छिन् । आफू बसेको मेचबाट जुरुक्क उठेर टेबल ठटाउँदै आशिकाले चिरिबाबुलाई भन्छिन्, ‘अब जे हुन्छ, बञ्चरेडाँडामा हुन्छ, त्यहाँका चैँ मान्छे होइन ?’

चिरिबाबु थामथुम पार्ने प्रयास गर्दै ‘सुन्नुस् न सुन्नुस्, सुन्नुस न सुन्नुस’ भनिरहन्छन् ।

तैपनि आशिका चुप रहन्नन् । टेबल ठोक्दै स्थानीय सरकारले आँखा चिम्लेकाले यस्तो अवस्था आएको जिकिर गर्छिन् ।

विवाद बढ्दै जाँदा आशिका बैठक छाडेर हिँड्छिन् ।