काठमाडौं– नेपालमा विकास भएको एआईमा आधारित व्यावसायिक सञ्चार प्लेटफर्म ‘टिङटिङ’ले अन्तर्राष्ट्रिय बजारमा आफ्नो सेवा विस्तार थालेको छ । 

नेपाली प्रविधि कम्पनी प्रिक्साले श्रीलङ्काको अग्रणी दूरसञ्चार सेवा प्रदायक डायलग आजियाटासँग रणनीतिक व्यावसायिक सम्झौता गरेको हो।

सम्झौतापत्रमा प्रिक्साका प्रमुख कार्यकारी अधिकृत मनिष शर्मा र डायलगका इनोभेसन एन्ड प्लेटफर्म्स बिजनेस प्रमुख तथा उपाध्यक्ष विरङ्गा सेनेभिरत्नेले हस्ताक्षर गरेका छन्।

सम्झौतापछि प्रिक्साका सीईओ शर्माले डायलगजस्तो बलियो साझेदारसँग सहकार्य गर्न पाउँदा उत्साहित भएको बताए । 

उनका अनुसार यो सहकार्य व्यवसाय विस्तारमा मात्र सीमित नभई नेपाल र श्रीलङ्काबीच प्रविधिको बलियो इकोसिस्टम निर्माण गर्नसमेत सहयोगी बन्नेछ ।

सम्झौतासँगै टिङटिङले श्रीलङ्काली बजारमा आफ्ना विभिन्न डिजिटल सञ्चारसम्बन्धी उत्पादन उपलब्ध गराउन थालेको छ । 

कम्पनीको एकीकृत ‘टिङटिङ कम्युनिकेसन सुइट’अन्तर्गत ‘कनेक्ट’, ‘ओम्नी’, ‘ब्रोडकास्ट’ र ‘एजेन्ट’ गरी चार प्रमुख उत्पादन सञ्चालनमा छन्।

‘टिङटिङ कनेक्ट’ संस्थाको आफ्नै पूर्वाधारमा जडान गर्न सकिने प्रणाली हो । 

‘द बक्स’ नामक अन-प्रिमाइस उपकरणमार्फत संस्थाको डेटा आफ्नै पूर्वाधारभित्र सुरक्षित राखेर सेवा सञ्चालन गर्न सकिने कम्पनीले जनाएको छ ।

त्यस्तै, ‘टिङटिङ ओम्नी’ले ह्वाट्सएप, भाइबर, मेसेन्जर, वेबच्याट र एसएमएसलगायत विभिन्न डिजिटल माध्यमबाट आउने ग्राहक संवादलाई एउटै इनबक्समा एकीकृत गर्छ।

‘टिङटिङ ब्रोडकास्ट’मार्फत हजारौँ ग्राहकलाई एकैपटक स्वचालित भ्वाइस कलबाट सूचना तथा रिमाइन्डर पठाउन सकिन्छ । ‘टिङटिङ एजेन्ट्स’ले स्थानीय भाषामा ग्राहकसँग प्रत्यक्ष संवाद गर्न तथा आवश्यक परे मानव एजेन्टमा संवाद हस्तान्तरण गर्न सक्ने कम्पनीले जनाएको छ ।

नेपाली भाषामा उपलब्ध यी सेवा अहिले अङ्ग्रेजी र सिंहली भाषामा समेत सञ्चालन भइरहेका छन्। श्रीलङ्काली बजारलाई लक्षित गर्दै कम्पनीले तमिल र सिंहली भाषाका लागि थप परिष्कृत भ्वाइस मोडल विकासमा समेत काम गरिरहेको जनाएको छ ।

नेपालमा सूचना प्रविधि तथा सफ्टवेयर निर्यातको सम्भावना बढिरहेका बेला श्रीलङ्काको ठूलो दूरसञ्चार कम्पनीसँग भएको यो सम्झौतालाई नेपाली टेक उद्योगका लागि महत्वपूर्ण उपलब्धिका रूपमा हेरिएको छ ।

‘नेपालमा निर्मित, विश्वका लागि’ भन्ने अवधारणासहित अघि बढिरहेको टिङटिङको अन्तर्राष्ट्रिय विस्तारले नेपाली प्रविधि कम्पनीले स्वदेशमै विकास गरेका उत्पादनलाई विदेशी बजारमा समेत प्रतिस्पर्धी बनाउन सक्ने सम्भावना देखाएको छ