गैँडाकोट– यहाँको गैंडाकोट नगरपालिका-१४, माथिल्लो भागरस्थित मामाघरबाट हराएका साढे दुई वर्षीय बालक सिवान तामाङ दुई दिनपछि सकुशल भेटिएका छन् ।

मंगलबार बिहान हजुरआमा यामकुमारी आले मगर च्याउ खोज्न शंखदेवी सामुदायिक वनतर्फ जाने क्रममा सिवानले पछ्याएका थिए । उनी हजुरआमालाई पछ्याउँदै जंगलमा छिरेका थिए । हजुरआमालाई पछ्याउँदै छिरेपछि उनी बाटो बिराएर उनी घना जंगलभित्र पुगेर हराएका थिए।

सिवानका आमाबुवा रोजगारीका लागि भारतमा छन् । त्यहीकारण उनी डेढ वर्षदेखि मामाघरमै बस्दै आएका थिए।

बालक हराएको जानकारी पाएलगत्तै नेपाल प्रहरी, सशस्त्र प्रहरी बल, जनप्रतिनिधि र स्थानीयवासीले संयुक्त रूपमा खोजी थालेका थिए। रातदिन नभनी गरिएको खोजीका क्रममा दुई दिनपछि बालकलाई सकुशल भेटिएको हो ।

बालक सकुशल भेटिएपछि खोजी अभियानमा संलग्न सुरक्षाकर्मी, जनप्रतिनिधि तथा स्थानीयवासीले खुसियाली मनाएका छन्।