काठमाडौं – स्वास्थ्यमा समस्या देखिएपछि पूर्वाधार विकासमन्त्री सुनिल लम्साललाई धनगढीबाट काठमाडौं ल्याइएको छ । उनलाई आइतबार नेपाली सेनाको हेलिकोप्टरमार्फत काठमाडौं ल्याएर छाउनीस्थित वीरेन्द्र अस्पतालमा भर्ना गरिएको हो ।

मन्त्री लम्सालको सचिवालयका अनुसार उनको अहिले वीरेन्द्र अस्पताल छाउनीमा उपचार भइरहेको छ । लम्साल शनिबार दार्चुलाबाट बैतडीको गोठालापानी पुगेका थिए। गोठालापानीस्थित हेरिटेज होटलमा बसेका बेला उनलाई भाइरल ज्वरो र रुघाको संक्रमण देखिएको थियो ।

स्वास्थ्यमा समस्या देखिएपछि जिल्ला अस्पताल बैतडीका एमडीजीपी डा। पविन उपाध्याय आइतबार बिहान पौने ९ बजे मन्त्री बसेको होटलमै पुगेका थिए ।

डा। उपाध्यायका अनुसार लम्सालमा निद्रा अपुग भएको तथा मुटुको धड्कन बढेको समस्या देखिएको थियो । उनका अनुसार धनगढीको तुलनामा बैतडीको मौसम चिसो भएकाले शरीरले तापक्रममा भएको परिवर्तन सहज रूपमा समायोजन गर्न नसकेको हुनसक्छ।

स्वास्थ्यमा समस्या देखिएपछि थप उपचार र स्वास्थ्य परीक्षणका लागि मन्त्री लम्साललाई सेनाको हेलिकोप्टरमार्फत काठमाडौं ल्याइएको हो। अहिले उनको स्वास्थ्य अवस्था चिकित्सकको निगरानीमा रहेको छ।