काठमाडौं – नेपाली कांग्रेसका पूर्वसभापति शेरबहादुर देउवा काठमाडौं फर्किँदा स्वागतमा प्रयोग भएका गाडी र मोटरसाइकललाई ट्राफिक प्रहरीले कारबाही गरेको छ ।

ट्राफिक नियम उल्लङ्घन गरेको कसुरमा देउवा सवार गाडी र स्वागतमा सहभागी मोटरसाइकललाई उपत्यका ट्राफिक प्रहरी कार्यालयले कारबाही गरेको हो ।

देउवा गत बिहीबार साउन २८ गते त्रिभुवन अन्तर्राष्ट्रिय विमानस्थलमा ओर्लिएपछि बागमती प्रदेश–०१–०२९ च–९३४३ नम्बरको गाडीमा महाराजगञ्जस्थित निवास गएका थिए। नेता तथा कार्यकर्ताले विमानस्थलदेखि निवाससम्म उनलाई उक्त गाडीमा लगेका थिए ।

उक्त गाडीको ढोकाको साइडमा ६ जना झुण्डिएर यात्रा गरेको पाइएको थियो । यात्रु राख्न नमिल्ने स्थानमा यात्रु राखेको कसुरमा गाडीका चालकलाई ट्राफिक प्रहरीले एक हजार रुपैयाँ जरिबाना गरेको छ ।

उपत्यका ट्राफिक प्रहरी कार्यालयका एसपी नरेश सुवेदीका अनुसार ट्राफिक नियमविपरीत सवारी चलाउने सबैलाई कारबाही गरिनेछ । त्यस्तै, देउवाको स्वागतमा सहभागी भएको अर्को मोटरसाइकलमा तीन जना सवार रहेको पाइएपछि चालकलाई पनि कारबाही गरिएको छ। भारबहन क्षमताभन्दा बढी यात्रु बोकेको कसुरमा मोटरसाइकल चालकलाई ५ सय रुपैयाँ जरिबाना गरिएको प्रहरीले जनाएको छ।

ट्राफिक प्रहरीले देउवा सवार गाडीको भिडियो सामाजिक सञ्जालमा सार्वजनिक गर्दै दुर्घटनाबाट बच्न ट्राफिक नियम पालना गर्न आग्रह गरेको छ। प्रहरीले भिडियोसँगै ‘दुर्घटना बाजा बजाएर आउँदैन, सावधानीले भने रोक्न सक्छ’ भन्ने सन्देशसमेत सार्वजनिक गरेको छ ।

प्रहरीले राजनीतिक वा अन्य कुनै कार्यक्रमका क्रममा पनि सवारी साधनमा क्षमताभन्दा बढी यात्रु राख्ने, सवारीको बाहिरी भागमा झुण्डिएर यात्रा गर्ने तथा अन्य ट्राफिक नियम उल्लङ्घन नगर्न आग्रह गरेको छ।