चितवन– चितवनको राप्ती नगरपालिका–१ डिपार्ट बस्तीमा बाघको आक्रमणबाट एकजना व्यक्ति तथा एकवटा जर्सी गाई घाइते भएका छन् । 

जिल्ला प्रहरी कार्यालय चितवनका अनुसार बिहीबार बिहान करिब ६ बजेर ४० मिनेटमा चितवन राष्ट्रिय निकुञ्जबाट बस्तीमा पसेको बाघले राप्ती नगरपालिका–१ निवासी ६० वर्षीय ठाकुर अधिकारीलाई आक्रमण गर्दा उनी सामान्य घाइते भएका हुन् । 

घाइते अधिकारीको भरतपुर सरकारी अस्पतालमा उपचार भइरहेको छ । उक्त बाघले सोही स्थान निवासी दिला कुमारी तामाङको गोठमा रहेको जर्सी गाईलाई समेत आक्रमण गरी घाइते बनाएको थियो ।

बाघ नियन्त्रणका लागि निकुञ्ज र राष्ट्रिय प्रकृति संरक्षण कोषका कर्मचारी प्राविधिकहरूले हात्तीसहितको टोली खटेको थियो ।

उक्त टोलीले बाघलाई करिब साढे ११ बजे सफलतापूर्वक नियन्त्रणमा लिएर निकुञ्जको जिम्मा लगाइएको छ । 

पछिल्लो समय चितवनको मध्यवर्ती तथा बस्ती नजिकका क्षेत्रमा बाघ देखिने र मानव–वन्यजन्तु द्वन्द्वका घटना बढ्दै गएको भन्दै स्थानीयवासीले सुरक्षा व्यवस्थापनमा थप ध्यान दिन सम्बन्धित निकायसँग माग गरेका छन् ।