कास्की– पोखरामा पुनः सोमबार प्याराग्लाइडिङ दुर्घटना हुँदा दुई जना विदेशी नागरिक घाइते भएका छन् । कास्कीका छुट्टाछुट्टै ठाउँमा दुई वटा प्याराग्लाइडिङ दुर्घटना भएका हुन् ।

माछापुच्छ्रे गाउँपालिकाको ठाँटीमा बिजुलीको खम्बामा ठोक्किएर घाइते भएका पोल्याण्डका ३० वर्षीय जानुज कारोलको एउटा हात जलेको बताइएको छ । उनको पोखरास्थित मणिपाल अस्पतालमा उपचार भइरहेको छ । उनी पोखराको ब्लु स्काइ कम्पनीबाट अनुमति लिएर उडेका थिए ।

त्यस्तै अर्का विदेशी प्याराग्लाइडर ६३ वर्षीय रुसी इलगिज यागुदिन भने कास्कीकै मादी गाउँपालिकाको शिरखानीमा दुर्घटनामा परेका थिए । उनी रूखमा अड्किएका थिए । उनलाई स्थानीयवासीले उद्धार गरेका छन् । उनको अवस्था भने सामान्य रहेको छ ।

पोखरामा आइतबार मात्रै प्याराग्लाइडिङ्ग दुर्घटना हुँदा एक रोमानियालीको मृत्यु भएको थियो ।