काठमाडौं– प्रतिनिधिसभाका सभामुख डोलप्रसाद अर्यालले मुलुकको विकासको यात्रालाई अघि बढाउन सकारात्मक दृष्टिकोणको खाँचो रहेको बताएका छन् । 

नेपाल एसोसिएसन अफ टुर एण्ड ट्राभल एजेन्ट्स (नाट्टा)को ५९ औँ वार्षिक साधारणसभाका अवसरमा शुक्रबार काठमाडौंमा आयोजित कार्यक्रममा सभामुख अर्यालले विकास लामो यात्रा भएकाले उद्देश्य प्राप्तिमा केही समय लाग्न सक्ने यथार्थलाई स्विकार्नुपर्ने बताए ।

‘केही भएन वा गर्न सकेन’ भन्दैसमाजमा नकारात्मक सन्देश फैलाउन नहुने भन्दै उनले नकारात्मकताले देशलाई पुनः असफलतातिर धकेल्ने खतरा रहने धारणा राखे ।  

उनले इतिहासमै पहिलो पटक सरकार र प्रतिनिधिसभाले बलियो जनादेश पाएको हुँदा असफल हुने छुट नरहेको बताए ।

सभामुख अर्यालले विगतमा कानुन बनाउँदा छुटेका सरोकारवालाहरूलाई अबका नीति–निर्माण प्रक्रियामा प्रत्यक्ष रूपमा समेटिने प्रतिबद्धता समेत जनाए । 

उनले देशको भूगोल र चेतनालाई सुहाउँदो उत्कृष्ट कानुन निर्माण गर्न र आगामी पुस्ताका लागि बस्नलायक देश बनाउन अहोरात्र खट्ने उल्लेख गरे ।