दोलखा– जिल्लामा पछिल्ला दिनमा जंगली जनावर बाँदरको आतंक बढेपछि जिल्लाभरका किसान चिन्तित बनेका छन् । 

भित्र्याउने बेलाको खेतबारीमा लगाइएको मकै बाँदरको हुलले सखाप पार्न थालेपछि किसानहरू समस्यामा परेका हुन् ।

किसानको मुख्य बालीका रूपमा लगाइएको मकै बाँदरले खान थालेपछि किसानहरू दिनरात मकै जोगाउन र बाँदर धपाउन जोखिम मोल्न बाध्य छन् । बाँदर धपाउने क्रममा स्थानीयमाथि आक्रमणसमेत हुन थालेको छ ।

बुधबार २/३ सयको हुलमा मकै खान बारीमा पसेका बाँदर धपाउने क्रममा वैतेश्वर गाउँपालिका–६ का प्रशुराम घिमिरे घाइते भए । बारीमा मकै खाइरहेका बाँदरलाई लखेट्न खोज्दा उल्टै आफूमाथि बाँदर आइलागेर कुटेको घिमिरेले बताए । 

बाँदरको कुटाइ र टोकाइबाट उनको हातखुट्टामा चोट लागेको छ । उनको स्थानीय स्वास्थ्य संस्थामा उपचार भइरहेको छ ।

वैतेश्वर क्षेत्रमा गरिएको अनुगमनका क्रममा करिब ३ देखि ७ सयको संख्यामा बाँदर रहेको पाइएको छ । 

वैतेश्वरका नाम्दु, घिमिरे टार, खनियाचौर, बनगाउँ, मार्बु, पात्ले, मिर्गे, मजुवा पाइले, खानीगाउँ, चिलाउनेखड्का, कालथोक, डाँडागाउँलगायतका बस्तीमा बाँदरको आतंक बढी रहेको स्थानीयले बताएका छन् ।

यी गाउँमा पछिल्लो समय स्थानीयको दैनिकीजस्तै बाँदर धपाउने र मकै कुरेर बित्ने गरेको छ । खेतबारीमा लगाएको बाली जोगाउन किसानहरू बिहानदेखि साँझसम्म बारीमै बस्नुपर्ने अवस्था आएको स्थानीयको भनाइ छ ।

मकै पाकेर भित्र्याउने समयमै बाँदरको हुल आएर बाली नष्ट गर्न थालेपछि किसानहरू यस वर्षको उत्पादन घट्ने चिन्तामा छन् । 

बाँदर नियन्त्रणका लागि सम्बन्धित निकायले तत्काल प्रभावकारी उपाय अपनाउनुपर्ने किसानहरूको माग छ । सुवाश बस्नेत/दोलखा