तेहरान– इरानले हर्मुज जलघाँटीमा अमेरिकाको ‘पूर्ण नियन्त्रण’ कायम रहेको अमेरिकी राष्ट्रपति डोनाल्ड ट्रम्पको दाबी अस्वीकार गर्दै जलमार्ग अझै पूर्ण रूपमा नखुलेको जनाएको छ।

इरानको पर्सियन गल्फ स्ट्रेट अथोरिटी (पीजीएसए) ले सामाजिक सञ्जाल एक्समार्फत हर्मुज जलघाँटी अझै अवरुद्ध रहेको र तेहरानले राखेका सर्त पूरा नभएसम्म जलमार्ग पूर्ण रूपमा नखोलिने जनाएको हो।

यो प्रतिक्रिया अमेरिकी राष्ट्रपति ट्रम्पले हर्मुज जलघाँटीमा अमेरिकाको ‘पूर्ण नियन्त्रण’ रहेको दाबी गरेको केही घण्टापछि आएको हो। ट्रम्पले सामाजिक सञ्जाल ट्रुथ सोसलमा अमेरिकी नौसेनाको उपस्थितिलाई ‘स्टिलको पर्खाल’ को संज्ञा दिँदै इरानले त्यसविरुद्ध केही गर्न नसक्ने दाबी गरेका थिए।

ट्रम्पले अमेरिकी नौसेनाले हर्मुज क्षेत्रमा नाकाबन्दी कायम राखेको तथा इरानको सैन्य पूर्वाधारमा ठूलो क्षति पुर्‍याइएको दाबी गरेका थिए। उनले इरानको आर्थिक अवस्था र उच्च मुद्रास्फीतिको अवस्थाबारे समेत टिप्पणी गरेका थिए ।

यसैबीच, इरानको सर्वोच्च राष्ट्रिय सुरक्षा परिषद्का नवनियुक्त प्रमुख मोहसेन रेजाईले पनि इरानका सबै सर्त पूरा नभएसम्म हर्मुज जलघाँटी पूर्ण रूपमा नखोलिने बताए।

रेजाईका अनुसार अमेरिका–इरान युद्ध तथा नाकाबन्दी अन्त्य हुनुपर्ने, इरानका रोक्का गरिएका सम्पत्ति फुकुवा गरिनुपर्ने तथा लेबनान र गाजामा क्षेत्रीय युद्धविराम हुनुपर्ने इरानको माग छ। यी सर्त पूरा नभएसम्म जलघाँटी बन्द रहने उनले दाबी गरेका छन् ।