वीरगन्ज– पर्सामा काठ तस्कर र गस्तीमा रहेको वन रक्षकको टोलीबीच गोली हानाहान भएको छ ।

डिभिजनल वन कार्यालय पर्सा मातहत रहेको (राष्ट्रिय वन क्षेत्र) वर्मीनार र मनवाको क्षेत्रमा तस्कर र गस्ती टोलीबीच गोली हानाहान भएको हो ।

डिभिजनल वन कार्यालय पर्साका सूचना अधिकारी वशिष्टनारायण कुर्मीले गस्तीमा रहेको वन रक्षकको टोली र तस्करहरुबीच गोली हानाहान भएको बताए ।

‘वन क्षेत्रबाट काठ तस्करी भइरहेको भन्ने सूचनाका आधारमा हाम्रो गस्ती टोली परिचालन भएको थियो,’ डिभिजनल वन कार्यालय सूचना अधिकारी कुर्मीले भने, ‘हाम्रो टोलीसँग जम्काभेट भएपछि तस्करहरुले नै २ राउण्ड गोली हाने । हाम्रो तर्फबाट पनि ३ राउण्ड जवाफी फायरिङ भयो ।’

सोमबार बिहान करिब २ बजेरित गोली हानाहान भएपनि तस्करहरु भने भाग्न सफल भएका छन् ।

गस्तीमा रहेको वन रक्षकको टोलीले तस्करी गरेर ओसार्न लागिएको ४ गोलीया सालको काठ, ४ वटा साइकल र काठ चिर्न प्रयोग भएका २ वटा आरा बरामद गरेको छ ।

तस्करहरुको खोजीका लागि वन रक्षकको गस्ती टोली परिचालन भएको कुर्मीले खबरहबलाई जानकारी दिए ।