काठमाडौं– नेपाल एलपी ग्यास उद्योग संघले उपभोक्ताले अतिरिक्त ग्यास खरिद नगर्ने हो भने अहिले बजारमा देखिएको ग्यासको अभाव समाधान हुने जनाएको छ । 

संघले आइतबार विज्ञप्ति जारी गर्दै अहिले ग्यासको आयात बढेको उपभोक्ताले ग्यास अभाव हुने आशंकामा अतिरिक्त सिलिण्डर होल्ड गर्दा समस्या देखिएको बताएको हो ।

संघले निगमको पहलमा भारतको विभिन्न रिफाइनरीहरूबाट सहजरूपमा अहिले ग्यासको आयातमा १५ प्रतिशतले वृद्धि भएको जनाउँदै उद्योगहरूबाट पनि ग्यास रिफिलिङ गरी बजारीकरण गर्ने काम भइरहेको संघले जनाएको छ । 

तर, ‘ग्यास अभाव हुने आशंकामा उपभोक्ताहरूमा अनावश्यकरूपमा सिलिण्डरहरू सञ्चय गर्ने(होल्ड) गर्ने, जगेडा राख्ने वा आवश्यकताभन्दा बढी खरिद गर्ने कार्यबाट बजारमा ग्यासको कृत्रिम अभाव सिर्जना भइरहेको परिप्रेक्ष्यमा ग्यास अति आवश्यक भएका उपभोक्ताले ग्यास नपाएर दौडधुप गर्नुपर्ने अवस्था सिर्जना भएको छ’, संघले उल्लेख गरेको छ ।

संघले घरायसी प्रयोगकर्ता उपभोक्तालाई प्राथमिकतामा राखी ग्यास बिक्री वितरण गर्न बिक्रेताहरूलाई अनुरोध गरेको छ ।