काठमाडौं– नेपालमा यस वर्षको मुख्य बाली धानको रोपाइँ अन्तिम चरणमा पुगेको छ । 

कृषि विभागको तथ्याङ्क अनुसार आज साउन २२ गतेसम्म देशभर कुल धान रोप्न योग्य क्षेत्रफलको ९५.५ प्रतिशत भू–भागमा रोपाइँ सम्पन्न भएको हो ।

गत वर्षको तुलनामा यस वर्ष रोपाइँको गति उत्साहजनक देखिएको छ । गत वर्ष साउन २५ गतेसम्म ९१.३१ प्रतिशत मात्र रोपाइँ भएको थियो । 

यस वर्ष देशभरको कुल १३ लाख ७० हजार ६२ हेक्टर धान खेती हुने क्षेत्रफलमध्ये हालसम्म १३ लाख ८ हजार ३ सय ८३ हेक्टरमा रोपाइँ सकिएको छ ।

विशेषगरी मधेश प्रदेशमा गत वर्षको सोही अवधिमा ६६.५४ प्रतिशत मात्र रोपाइँ भएकोमा यस वर्ष साउन २२ गतेसम्म ९४.६५ प्रतिशत रोपाइँ भइसकेको छ, जसले उत्पादनमा सकारात्मक प्रभाव पार्ने अपेक्षा गरिएको छ ।

तथ्याङ्क अनुसार सुदूरपश्चिम प्रदेशमा धान रोपाइँ शतप्रतिशत सम्पन्न भएको छ । त्यहाँको १ लाख ४५ हजार ९ सय ५० हेक्टर क्षेत्रफलमा नै रोपाइँ सकिएको विभागको तथ्यांकमा उल्लेख छ । 

धान रोपाइँको प्रदेशगत अवस्था

बागमती प्रदेश : ९७.८२ प्रतिशत (१ लाख १२ हजार ३३ हेक्टर)
कर्णाली प्रदेश : ९६.८२ प्रतिशत (४१ हजार ९ सय १२ हेक्टर)
गण्डकी प्रदेश : ९५.५७ प्रतिशत (८९ हजार ४ सय ५९ हेक्टर)
लुम्बिनी प्रदेश : ९४.८३ प्रतिशत (२ लाख ८५ हजार ७ सय ८७ हेक्टर)
मधेश प्रदेश : ९४.६५ प्रतिशत (३ लाख ६५ हजार २ सय ९१ हेक्टर)
कोशी प्रदेश : ९३.६९ प्रतिशत (२ लाख ५८ हजार ९ सय ५० हेक्टर)
सुदूरपश्चिम प्रदेश : १०० प्रतिशत (१ लाख ५४ हजार ९ सय ५० हेक्टर)