काठमाडौं- जिल्ला अदालत भक्तपुरले मेडिकल व्यवसायी दुर्गा प्रसाईंलाई रिहा गर्न आदेश दिएको छ।

प्रसाईंलाई जिल्ला अदालत भक्तपुरका न्यायाधीश नवराज दाहालको इजलासले म्याद थप नगरी रिहा गर्न आदेश दिएको हो ।

अदालतका तहसिलदार दलबहादुर बजिमयँले प्रसाईंलाई म्याद थप गरेर अनुसन्धान अघि बढाउन प्रहरीले गरेको माग अस्वीकार गर्दै रिहा गर्न आदेश भएको बताए ।

अभियन्ता प्रसाईंलाई आइतबार राति प्रहरीले भक्तपुरको ठिमीस्थित निवासबाटै समातेको थियो। जिल्ला प्रहरी परिसर भक्तपुर र अपराध अनुसन्धान कार्यालय टेकुको टोलीले भक्तपुरस्थित घरबाटै पक्राउ गरिएका उनीमाथि सामाजिक सद्भाव भड्काएको आरोप लगाइएको थियो।

उनले आइतबार दिउँसो पत्रकार हिन्दू राज्य र राजसंस्था पुनर्स्थापना गर्न आन्दोलन चर्काउने घोषणा गरेका थिए । प्रसाईंलाई यसअघि पनि भड्काउ अभिव्यक्ति दिएको आरोपमा सरकारले पटक पटक पक्राउ गर्ने गरेको छ।