काठमाडौं- सुनसरीको देवानगञ्ज गाउँपालिकास्थित कप्तानगञ्जमा आइतबार रातिदेखि सुरू भएको तनाव अब मधेश प्रदेशतिर पनि सरेको छ।

दुई समुदायबीचको तनावलाई सरकारले समयमै सम्बोधन गर्न नसक्दा सप्तरी, सिरहा हुँदै मधेश प्रदेशको राजधानी धनुषासम्मै गम्भीर समस्या देखिएको छ।

बिहीबार सिरहाको गोलबजारसहितका क्षेत्रमा स्थानीय प्रशासनले कर्फ्यु लगाइसकेको छ। उता सिरहाको मुख्य बजार लहान क्षेत्रमा पनि दुई समुदाय प्रदर्शनमा उत्रिएका छन् ।

प्रदर्शन चर्किँदै गएपछि प्रहरीले लहान बजार क्षेत्रमा अश्रुग्यास हानेको छ, केही राउन्ड हवाई फायर पनि गरेको छ।

पत्रकार मिथिलेश यादवले आफ्नै निवासअगाडि प्रहरीले अश्रुग्यास हानेको र हवाई फायर गरेको जानकारी दिएका छन्।

उता धनुषामा प्रदर्शनले तनावको रुप लिएपछि जिल्ला प्रशासन कार्यालय धनुषाले जनकपुर उपमहानगरपालिका क्षेत्रमा दिउँसो साढे ३ बजेदेखि कर्फ्यु आदेश घोषणा गरेको छ।

धनुषाका प्रमुख जिल्ला अधिकारी प्रेमप्रसाद लुइँटेलले त्यहाँ अनिश्चितकालका लागि कर्फ्यू आदेश जारी गरेका हुन् । प्रशासनले उपमहानगरपालिकाका सम्पूर्ण क्षेत्रसहित लक्ष्मीनिया गाउँपालिका र नगरायन नगरपालिका क्षेत्र कर्फ्यु लगाएको हो ।