काठमाडौं– सभामुख डिपी अर्यालले प्रधानमन्त्री बालेन्द्र शाहसँग मंगलबार भेटवार्ता गरेका छन्। उनले नेपाल कम्युनिष्ट पार्टी (एमाले) संसदीय दलका नेता रामबहादुर थापासँग पनि छुट्टै भेट गरी समसामयिक संसदीय विषयमा छलफल गरेका छन् ।

सभामुखको सचिवालयका अनुसार सभामुख अर्यालले विपक्षी दलका नेता भीष्मराज आङ्देम्बे तथा नेपाल कम्युनिष्ट पार्टीका नेता वर्षमान पुनसँग पनि मंगलबार छुट्टाछुट्टै भेटवार्ता गरेका थिए ।

भेटवार्ताका क्रममा प्रतिनिधिसभाको बैठकलाई थप प्रभावकारी, मर्यादित र परिणाममुखी बनाउने, संसदीय गतिविधिलाई व्यवस्थित ढंगले सञ्चालन गर्ने तथा समसामयिक संसदीय विषयमा विचार आदानप्रदान भएको सचिवालयले जनाएको छ।

यसैगरी, सभामुख अर्यालले मंगलबार विभिन्न राजनीतिक दलका प्रमुख सचेतक तथा सचेतकहरूसँग पनि छलफल गरेका थिए।

छलफलमा प्रतिनिधिसभाको कार्य सञ्चालनलाई थप प्रभावकारी बनाउने, आगामी बैठकका कार्यसूचीलाई व्यवस्थित रूपमा अघि बढाउने तथा संसद्को कामकारबाहीलाई सहमतिका आधारमा सञ्चालन गर्ने विषयमा विचार आदानप्रदान भएको जनाइएको छ।