काठमाडौं- सुनसरीको कप्तानगञ्जमा भएको घटना छानबिनका लागि गठन भएको समिति घटनास्थल पुगेको छ । सुनसरीका प्रमुख जिल्ला अधिकारी ईश्वरीप्रसाद अर्यालले छानबिन समिति घटनास्थल आएर आवश्यक अनुसन्धान गरिरहेको जानकारी दिए ।

आइतबार अबेर दुई समुदायबीच भएको झडपका कारण सुनसरीको स्थिति तनावग्रस्त छ । प्रजिअ अर्यालका अनुसार अहिलेसम्म यहाँको स्थिति सामान्य बनिसकेको छैन । यहाँ सशस्त्र प्रहरीले गोलीबाट एक जनाको मृत्यु भएको छ भने अरु प्रहरीसहित २४ जना घाइते भएपछि छानबिन समिति बनेको थियो ।

गृहमन्त्रालयले ५ सदस्यीय छानबिन समिति बनाएर आवश्यक अनुसन्धान अगाडि बढाएको छ । मन्त्रालयका सहसचिव भूपेन्द्र थापाको संयोजकत्वमा बनेको समितिले अस्पताल पुगेर घाइतेहरूलाई भेट्नुका साथै आवश्यक छलफल समेत गरिरहेको बताइएको छ। जिल्ला प्रशासन कार्यालय सुनसरीमा घटनाबारे थप अनुसन्धान र स्थिति सामान्य बनाउनका लागि विभिन्न सरोकार निकायहरूले छलफल गरिरहेका छन् ।

सुनसरीको भोक्राह, कोशी गाउँपालिका, इनरुवा नगरपालिकागायतमा अझै अवस्था सामान्य हुन सकेको छैन । यो घटनालाई लिएर देशका विभिन्न स्थानमा प्रदर्शन समेत भइरहेको छ । घटनाको विषयमा नेपाल सरकारका प्रधानमन्त्री र गृहमन्त्रीले समेत अहिलेसम्म मुख खोलेका छैनन् ।

प्रधानमन्त्री वालेन्द्र शाह र गृहमन्त्री सुधन गुरुङ मौन देखिएका छन् । स्थानीयहरू पनि सरकारको तर्फबाट घटनाबारे आवश्यक प्रक्रिया र चासो नदेखाइएको आरोप लगाइरहेका छन् । यो क्षेत्रका बजार पसल सार्वजनिक संस्था लगायतको स्थानमा तनाव उत्पन्न भएको देखिन्छ । घटनाबारे सत्य तत्य बाहिर आएर दोषीलाई कारबाही हुनुपर्ने माग स्थानीयवासीको छ ।