काठमाडौँ –‘स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६’ संशोधनका लागि तयार पारिएको विधेयकको मस्यौदामाथि सुझाव दिने सोमबार अन्तिम दिन हो।

स्वास्थ्य तथा खाद्य स्वच्छता मन्त्रालयले गत साउन ६ गते सात दिनको समय सीमा तोकेर मस्यौदामाथि सर्वसाधारण र सरोकारवालाबाट राय/सुझाव मागेको थियो। इच्छुकले मन्त्रालयको कानुन शाखाको इमेलमार्फत सुझाव पठाउन सक्ने व्यवस्था गरिएको थियो।

प्रस्तावित संशोधनमा स्वास्थ्यकर्मीमाथि हुने हिंसाविरुद्धको कानुनी व्यवस्थालाई थप कडा बनाइने उल्लेख छ। साथै, स्वास्थ्य विषय अध्ययनरत विद्यार्थीलाई पनि ऐनको संरक्षणको दायरामा समेट्ने, हतियारसहित आपराधिक बल प्रदर्शनलाई निषेध गर्ने र मन्त्रालयलाई आवश्यक निर्देशिका तथा मापदण्ड बनाउने अधिकार दिने प्रस्ताव गरिएको छ।

सर्वसाधारणबाट प्राप्त सुझावको अध्ययनपछि मस्यौदा परिमार्जन गरी विधेयकलाई अगाडि बढाइने मन्त्रालयले जनाएको छ।