काठमाडौंं– औषधि व्यवस्था विभागले नयाँ फार्मेसी दर्ता तथा सञ्चालनमा रहेका फार्मेसीहरूको दर्ता प्रमाणपत्र नवीकरण गर्दा सम्बन्धित स्थानीय तहको सिफारिस पत्र अनिवार्य रूपमा पेश गर्नुपर्ने व्यवस्था लागू गरेको छ ।

विभागले एक सूचना जारी गर्दै औषधि व्यवसायलाई थप व्यवस्थित, पारदर्शी र जवाफदेही बनाउने उद्देश्यले यो व्यवस्था गरिएको बताएको छ । यसअघि संशोधित नागरिक वडापत्रमार्फत लागू गरिएका व्यवस्थाको निरन्तरतास्वरूप पुनः सूचना जारी गरेको विभागले जनाएको छ ।

सूचनामा नयाँ फार्मेसी दर्ता गर्न वा दर्ता प्रमाणपत्र नवीकरणका लागि निवेदन पेश गर्दा नियमअनुसारका अन्य कागजातसँगै सम्बन्धित स्थानीय तहको सिफारिस पत्र पनि अनिवार्य रूपमा संलग्न गर्नुपर्ने उल्लेख गरिएको छ ।

विभागले सम्बन्धित व्यवसायी, सरोकारवाला तथा सर्वसाधारणलाई जानकारी गराउँदै आवश्यक कागजात पूरा गरी नियमानुसार प्रक्रिया अघि बढाउन आग्रह गरेको छ ।