विराटनगर– कर्मचारी सञ्चय कोष शाखा कार्यालय विराटनगरले आर्थिक वर्ष २०८२/८३ को अवधिमा सञ्चय कोष भुक्तानी एवं विशेष सापटीअन्तर्गत कूल एक अर्ब ६९ करोड १९ लाख ४१ हजार रुपैयाँ रकम प्रवाह गरेको जनाएको छ ।

जसअन्तर्गत सञ्चय कोष भुक्तानीतर्फ तीन हजार ५०४ जनालाई एक अर्ब सात करोड २७ लाख रुपैयाँ र विशेष सापटीतर्फ एक हजार ६८१ जनालाई ६१ करोड ९२ लाख रुपैयाँ प्रवाह गरेको छ । 

सोही अवधिमा सामाजिक सुरक्षा सुविधाअन्तर्गत कार्यक्रम अनुदानतर्फ ५६ जनालाई २२ लाख ४० हजार रुपैयाँ, औषधोपचार खर्चबापत ६९ जनालाई ११ लाख १२ हजार ३०५ रुपैयाँ, सुत्केरी तथा शिशु स्याहार योजना खर्चबापत एक हजार ६५६ जनालाई एक करोड २४ लाख २० हजार रुपैयाँ र विशेष आर्थिक सुविधा (कल्याणकारी) तर्फ तीन जनालाई रु चार लाख ५० हजार वितरण गरिएको कार्यालय प्रमुख रुकमणि ठकुरीले जानकारी दिइन् ।

प्रमुख ठकुरीका अनुसार घर सापटीतर्फ धितोमा आधारित सापटी १६५ जनालाई ४४ करोड ५५ लाख रुपैयाँ रकम प्रवाह भएको छ । 

सुनसरी र मोरङ कार्य क्षेत्र रहेको सो शाखाले चालु आर्थिक वर्षदेखि खोटाङ र ओखलुढुङ्गा क्षेत्र विस्तार गरी सोलुखुम्बूलाई कर्जा क्षेत्र विस्तारका लागि कार्यालयबाट सिफारिस भएको उनले बताए ।