काठमाडौं– अर्थमन्त्री डा स्वर्णिम वाग्लेले बिजुलीको पूर्वाधारमा लगानी गर्नको लागि बिजुलीको उपभोगमा थोरै कर लगाइएको बताएका छन् । आइतबार पत्रकारहरूसँग अन्तरक्रिया गर्दै थोरै मात्रै रकम संकलन गरिएको उनले बताए ।

‘२०/३० युनिटसम्म त फ्री नै भइहाल्यो, ५० युनिटसम्म कर लाग्दैन, ५१ देखि १५० युनिटसम्म हाम्रो १२ लाख घरधुरी रहेछन्, औसत सहरी वा अर्धसहरी घरधुरी जसले पानी तान्ने पम्प, सामान्य विद्युतीय उपकरण र सामान्य खाना पकाउन बिजुली प्रयोग गर्छन् । उनीहरूको बिलमा १५० युनिट खपत गर्ने ५ प्रतिशतको भ्याटले जम्मा २४ रुपैयाँ बढ्ने हो’, उनले भने ।

अर्को १५१ देखि २५० युनिट खपत गर्ने २ लाख जति भएकोमा उनीहरूलाई २५ देखि सय रुपैयाँसम्म पर्ने उनले बताए । ५० युनिटसम्मको फ्री दिइएको हुँदा ५ प्रतिशत कसैको पनि नपुग्ने उनले बताए । उनले पछिका दिनमा भ्याट बापत लाग्ने रकम मूल्यमा नै समायोजन हुनसक्ने पनि बताएका छन् ।