काठमाडौं– अर्थमन्त्री डा स्वर्णिम वाग्लेले बजेट भाषणको क्रममा व्यवस्था गरिएको पुँजीगत लाभकर अन्तिम कर हुने सम्बन्धी विषय अन्तिम नै भएको बताएका छन् ।

आइतबार सिंहदरबारमा पत्रकारहरूसँग कुरा गर्दै वाग्लेले व्यवस्था गरिएको विषयमा भ्रम छर्न खोजिएको भन्दै सम्बन्धित पक्षको आग्रहमा नै सो व्यवस्था गरिएको बताएका हुन् ।

‘फाइनल भन्यो वाग्लेले होइन रहेछ क्या हो भनेर लेख देखे २/४ वटा फाइनल नै हो हजुर फाइनल हो । फाइनल गर्दिनुस् ५ प्रतिशत हामी अतिरिक्त विन्दु तिर्न तयार छौँ भनेर लाइन लागेर मकहाँ डेलिगेसन आउने साथीहरू यहीँ सिंहदरबार बाहिर हुनुहुन्छ, फाइनल चाहिँ गर्दिनुस्, यो तरबार सधैँ हामीमाथि झुण्डिराखोस बरु इन्डियामा १० र २० छ सर्ट टर्म र लङ टर्मको, हामीकहाँ ५ लाई १० नै पुर्याइदिए पनि हुन्छ ७.५ लाई १२–१५ नै पुर्याइदिए पनि हुन्छ, यो अनिश्चितता भयको बादल हटाइदिनुस् भनेपछि हामीले बडो उदारतापूर्वक ५ लाई जम्मा साढे ७ र साढे ७ लाई जम्मा १० प्रतिशत गरेर फाइनल सिल डन’, उनले भने ।

उनले स्पष्ट रूपमा काम गर्दा पनि भ्रम छरिएको बताए । साथै, उनले धेरै फर्म कम्पनी भएको अवस्थामा सेयर बजारबाट आएको आम्दानी खुलाउन सकिने पनि बताए ।