चितवन– बागमती प्रदेशका मुख्यमन्त्री इन्द्रबहादुर बानियाँले प्रदेश सरकारले आगामी आर्थिक वर्षको बजेट उद्योगमैत्री बनाउने तयारी गरिरहेको बताएका छन् ।

चितवनस्थित प्रिफ्याव प्यानल नेपाल प्रालिको अनुगमन तथा निरीक्षणपछि पत्रकारहरूसँग कुराकानी गर्दै मुख्यमन्त्री बानियाँले उद्योग तथा व्यवसाय प्रवर्द्धनलाई प्राथमिकतामा राखेर बजेट ल्याइने जानकारी दिए । उनले व्यवसायीलाई प्रोत्साहन गर्ने नीति अन्तर्गत उद्योगमैत्री कार्यक्रमहरू समावेश गरिने बताए ।

मुख्यमन्त्री बानियाँका अनुसार वातावरण तथा पर्यापर्यटनसँग सम्बन्धित २५ करोड रुपैयाँभन्दा कम लगानीका उद्योगहरूलाई बैंकिङ ब्याजमा ५० प्रतिशतसम्म अनुदान उपलब्ध गराउने कार्यक्रम कार्यान्वयनको चरणमा रहेको छ ।

यस्ता उद्योगहरूलाई सहुलियतपूर्ण कर्जाको पहुँचमा पुर्‍याउने नीति प्रदेश सरकारले अघि बढाएको उनले बताए ।

उनले ऊर्जा क्षेत्रको व्यवस्थापन गर्दै ऊर्जालाई उत्पादनसँग जोड्ने योजनामा प्रदेश सरकार रहेको उल्लेख गरे ।

उद्योग निरीक्षणका क्रममा उद्योगीहरूलाई राज्यको सहयोग आवश्यक रहेको भन्दै सरकारले निजी क्षेत्रसँग सहकार्य गरेर औद्योगिक विकासलाई गति दिने प्रतिबद्धता व्यक्त गरे ।