काठमाडौं- नेकपा एमालेका अध्यक्ष केपी शर्मा ओलीलाई गत शनिबार पक्राउ परेपछि दोस्रोपटक पार्टी सचिवालय बैठक बसिरहेको छ।

गत शनिबार भक्तपुरको गुन्डुबाट पक्राउ परेका अध्यक्ष ओली अहिले त्रिवि शिक्षण अस्पतालमा छन् ।

उनी पक्राउ परेलगत्तै उपाध्यक्ष रामबहादुर थापा बादलको अध्यक्षतामा एमालेको सचिवालय बैठक बसेको थियो।

त्यसपछि विकसित राजनीतिक घटनाक्रमको विषयमा छलफल गर्न मंगलबार मध्याह्न पनि सचिवालय बैठक बसिरहेको छ।

बैठकस्थल च्यासलबाट एकजना सचिवालय सदस्यले दिएको जानकारीअनुसार बादलको अध्यक्षतामा बसिरहेको बैठकले विरोधका थप कार्यक्रम तय गर्न सक्नेछ ।

यस बैठकमा एमाले संसदीय दलको नेताबारे पनि छलफल गर्न सक्ने बताइन्छ। यस्तै गत भदौको जेन-जी आन्दोलनमा दमन गरेको आरोपमा पक्राउ तत्कालीन प्रधानमन्त्री ओली लगायत नेताहरूमाथि सरकारको छानबिन र प्रतिशोधबारे पनि कुराकानी भइरहेको सचिव महेश बस्नेतले बताए ।

बस्नेतले ओलीलाई गरिएको पक्राउविरुद्ध थप विरोधका कार्यक्रम सचिवालयले तय गर्ने बताए । ‘अध्यक्ष केपी शर्मा ओली विरुद्ध भइरहेको प्रतिशोधपूर्ण गतिविधिको विरोधमा थप कार्यक्रम तय गर्न एमाले सचिवालय बैठक बसिरहेको छ’, उनले भने ।