काठमाडौं – दक्षिण लेबनानमा भएको संघर्षमा इजरायलका चार सैनिक मारिएका छन् भने दुई जना घाइते भएका छन्।  

इजरायल रक्षा बल (आईडीएफ)ले टेलिग्राममार्फत जारी गरेको विज्ञप्तिमा उक्त जानकारी दिएको छ।

आईडीएफका अनुसार घाइतेमध्ये दुई सैनिकलाई अस्पताल भर्ना गरिएको छ, जसमा एक जनाको अवस्था गम्भीर रहेको बताइएको छ। साथै, एक जना रिजर्भ सैनिक पनि घाइते भएका छन्।

यसैबीच, युनाइटेड नेशनले दक्षिण लेबनानमा संयुक्त राष्ट्रसङ्घीय अन्तरिम बल (यूएनआईएफआईएल) का तीन शान्ति सैनिक मारिएको जानकारी दिएको थियो।

उक्त घटनाप्रति प्रतिक्रिया दिँदै आईडीएफले घटनाको विस्तृत छानबिन भइरहेको जनाएको छ। ‘यी घटनाहरू हिज्बुल्लाहको आक्रमणका कारण भएका हुन् वा आईडीएफकै कारबाहीका क्रममा भएका हुन् भन्ने विषयमा स्पष्ट पार्न अनुसन्धान भइरहेको छ,’ विज्ञप्तिमा उल्लेख छ।

आईडीएफले थप भनेको छ, ‘यी घटनाहरू सक्रिय युद्ध क्षेत्रभित्र भएका हुन्, त्यसैले शान्ति सैनिकलाई भएको क्षतिलाई सिधै आईडीएफसँग जोड्नु उपयुक्त हुँदैन।’