रोयटर्स – हाइटीको प्रमुख अन्न भण्डार मानिने आर्टिबोनिट क्षेत्रको पेटिट–रिभिएर नजिकै सशस्त्र समूहले गरेको आक्रमणमा कम्तीमा ७० जनाको मृत्यु भएको छ । मानव अधिकारवादी संस्थाका अनुसार उक्त हिंसात्मक आक्रमणमा अन्य ३० जना घाइते भएका छन् ।

त्यहाँको सरकारले भने मृतकको संख्या १६ मात्र रहेको दाबी गरेको छ । स्थानीय सञ्चारमाध्यमका अनुसार आक्रमण २४ घण्टा जारी थियो । ग्याङका सदस्यले जाँ–डेनिस वरपरका ग्रामीण भेगमा पसेर अन्धाधुन्ध गोली प्रहार गर्नुका साथै सर्वसाधारणका घरमा आगजनी गरेका थिए ।

मानव अधिकारवादी संस्था ‘डिभेन्सर्स प्लस’ ले यस हिंसाका कारण ६ हजारभन्दा बढी मानिस विस्थापित भएको अनुमान गरेको छ । संयुक्त राष्ट्र संघका अनुसार उक्त क्षेत्रमा सशस्त्र समूहले छापा मार्न थालेपछि केही दिनयता मात्रै २ हजारभन्दा बढी मानिसले आफ्नो घर छाडिसकेका छन् ।

प्रहरीले सुरुमा १६ जनाको मृत्यु र १० जना घाइते भएको रिपोर्ट सार्वजनिक गरेको थियो भने नागरिक सुरक्षा निकायको प्रारम्भिक प्रतिवेदनमा १७ जनाको मृत्यु र १९ जना घाइते भएको उल्लेख थियो ।

संयुक्त राष्ट्र संघका महासचिवका प्रवक्ताले हैटीस्थित राष्ट्र संघीय कार्यालयले घटनाको सूक्ष्म अनुगमन गरिरहेको बताएका छन् । राष्ट्र संघका अनुसार मृतकको संख्या १० देखि ८० को बीचमा हुन सक्ने अनुमान गरिएको छ । प्रवक्ताले घटनाको निष्पक्ष र गम्भीर छानबिन गर्न माग गरेका छन् ।