काठमाडौं- पाकिस्तानमा पोलियो उन्मूलन अभियान सञ्चालनका लागि पैसाको अभाव भएको छ । आर्थिक संकटसँग संघर्षरत पाकिस्तानले पैसाको अभावका कारण पोलियो खोप कार्यक्रमको अवधि छोट्याउने भएको हो ।

यसअघि सात दिनसम्म सञ्चालन हुँदै आएको पोलियो खोप अभियान अब चार दिनमा सीमित हुने पाकिस्तानबाट प्रकाशित हुने द एक्सप्रेस ट्रिब्युनले उल्लेख गरेको छ । त्यसबाहेक खोप अभियानमा सहभागी स्वास्थ्यकर्मी र अन्य कर्मचारीको तलब सुविधामा पनि उल्लेख्य कटौती गरिएको छ ।

तलब सुविधामा कटौतीपछि स्वास्थ्यकर्मी आक्रोशित भएका छन् । यसअघि पोलियो खोप अभियानमा सहकागी स्वास्थ्यकर्मीले १३ हजार पाकिस्तानी रुपैयाँ प्राप्त गर्दै आएका थिए । अब त्यस रकम घटेर ७ हजारमा झरेको छ ।

त्यसैगरी, खोप अभियानका क्षेत्र इन्चार्जहरुले १९ हजार रुपैयाँ प्राप्त गर्दै आएकोमा अब त्यो रकम ९ हजार २ सय १६ रुपैयाँमा सीमित भएको छ ।

सरकारको यस कदमबाट पोलियो खोप अभियानको प्रभावकारितामा गम्भीर असर पर्ने चिन्ता उत्पन्न भएको छ । पाकिस्तानको रावलपिण्डी जिल्लामा आगामी फेब्रुअरी २ देखि ५ सम्म पोलियो खोप अभियान सञ्चालन हुँदैछ ।