काठमाडौं – वैज्ञानिक समाजवादी कम्युनिष्ट पार्टीको एकता पक्षधर समूह नेपाली कम्युनिष्ट पार्टीमा समाहित हुने भएको छ।

वैज्ञानिक समाजवादी कम्युनिष्ट पार्टी नेपाल परित्याग गर्दै केन्द्रदेखि जिल्ला तहसम्मका नेतृत्त्वसहितको एकता पक्षधर समूह आज नेपाली कम्युनिष्ट पार्टीमा औपचारिक रूपमा समाहित हुन लागेको हो। आज दिउँसो ४ बजे पार्टी केन्द्रीय कार्यालय पेरिसडाँडामा आयोजना हुने कार्यक्रममा उनीहरू समाहित हुने जनाइएको छ।

समाहित हुने नेतृत्त्वमा वैज्ञानिक समाजवादी कम्युनिष्ट पार्टीकी केन्द्रीय सदस्य तथा कार्यालय एवं सचिवालय सदस्य धनकुमारी सुनारको नेतृत्व रहेको छ। उनका साथमा केन्द्रीय प्रबुद्ध समिति सल्लाहकार सदस्य गणेश रसाइली, केन्द्रीय सदस्य तथा महिला संगठन सुदूर प्रदेश संयोजक यसोदा बराल, कैलाली जिल्ला पार्टी सदस्य तथा जात व्यवस्था उन्मूलन मोर्चा जिल्ला संयोजक विक्रम सुनारलगायत नेता–कार्यकर्ता नेपाली कम्युनिष्ट पार्टीमा प्रवेश गर्नेछन्।

यसैगरी तुलशी परियार, प्रिया बराल, दिपा राना, हेमा सुनार, संगीता सिजापति, करीता सिजापती, सुमित्रा खाति, शर्मिला जिजार, कमला पिसी तथा कञ्चनपुर जिल्ला महिला संगठन संयोजक रीता नेपालीसहितका नेता–कार्यकर्ताहरू पनि समाहित हुने कार्यक्रम रहेको छ।

कार्यक्रममा पार्टी संयोजक पुष्पकमल दाहाल ‘प्रचण्ड’ र सहसंयोजक माधव कुमार नेपालले नवप्रवेशी नेता–कार्यकर्तालाई स्वागत गर्नेछन्। पार्टी एकता र वामपन्थी आन्दोलनलाई थप सुदृढ बनाउने उद्देश्यका साथ यो समायोजन हुन लागेको बताइएको छ।