काठमाडौं– दक्षिण कोरिया र भारतले दुई देशबीचको व्यापारिक सम्बन्धलाई थप सहज र प्रभावकारी बनाउन भन्सार मामिलामा आपसी सहयोगलाई प्रगाढ बनाउने सहमति गरेका छन्। 

नयाँ दिल्लीमा आयोजित एक उच्चस्तरीय बैठकमा दक्षिण कोरियाको भन्सार सेवा र भारतको केन्द्रीय अप्रत्यक्ष कर तथा भन्सार बोर्डका प्रतिनिधिहरूबीच यससम्बन्धी महत्त्वपूर्ण समझदारी भएको हो।

बैठकका क्रममा दक्षिण कोरियाली पक्षले भारतमा सञ्चालित कोरियाली कम्पनीहरूले भन्सार क्लियरेन्स तथा प्रशासनिक प्रक्रियाका बेला भोग्नुपरेका विभिन्न कठिनाइहरूका बारेमा जानकारी गराएको थियो। 

भारतीय अधिकारीहरूले ती समस्याहरूको समाधानका लागि आवश्यक सहयोग पुर्याउने आश्वासन दिएका छन्। साथै, दुवै देशले द्विपक्षीय व्यापार सहजीकरणका साथै भन्सार अधिकारीहरूको क्षमता अभिवृद्धिका लागि संयुक्त तालिम कार्यक्रमहरू सञ्चालन गर्ने विषयमा समेत छलफल गरेका छन्।

दक्षिण कोरियाली भन्सार अधिकारीहरूले एसिया(प्रशान्त क्षेत्रमा भारत एक प्रमुख र रणनीतिक साझेदार रहेको उल्लेख गर्दै कोरियाली व्यवसायहरूका लागि भारतीय बजारमा निर्यात प्रक्रिया थप सरल बनाउन यो सहकार्यले महत्त्वपूर्ण भूमिका खेल्ने विश्वास व्यक्त गरेका छन्। 

यस सहमतिले दुई देशबीचको आर्थिक साझेदारीलाई थप उचाइमा पुर्याउन सहयोग पुग्ने अपेक्षा गरिएको छ।