काठमाडौं– भदौ १० गते भोटेकोसीमा आएको विनाशकारी बाढीका कारण अरु धेरै क्षतिसँगै चीनदेखि काठमाडौंसम्म आइपुग्ने लामो सडकखण्ड पनि पूर्ण रूपमा क्षतिग्रस्त बन्न पुगेको छ । जसका कारण रसुवा नाका हुँदै नेपाल ल्याउनको लागि आउँदै गरेका सयौँ मालबाहक साधन यतिबेला बाटोमा नै अलपत्र परेका छन् ।

बाढीले गरेको विनाशका कारण भएको मानवीय क्षतिको व्यवस्थापन, घाइतेको उपचार र अलपत्र परेकाको उद्धार कार्यलाई यतिबेला सरकारले प्राथमिकता दिएर काम गरिरहेको छ । अझै केही दिन सरकारले सोही कामलाई नै प्राथमिकतामा राखेर काम गर्नुपर्ने देखिन्छ ।

चीनबाट आउँदै गरेका र चीनतर्फ जाँदै गरेका सयौँ मालबाहक ट्रक बाढीसँगै हराइसकेका छन् । ती ट्रकसँगै सयौँको संख्यामा कामदार र कम्तिमा १५ जना भन्दा बढी व्यवसायी पनि बाढीसँगै हराएको हिमालय सीमापार वाणिज्य संघका अध्यक्ष रामहरि कार्की बताउँछन् ।

उनका अनुसार बाढीले कम्तिमा दुई अर्ब बढीको सामग्री बगाएको छ । जसको इन्स्योरेन्स समेत भएको अवस्था छैन । ‘किनकी केरुङसम्म आउँदा इन्स्योरेन्स हुन्छ, भन्सार जाँचपास भइसकेपछि यता इन्स्योरेन्स गर्नुपर्ने हुन्छ, त्यो दिन यताको अफिस खुल्न समय बाँकी नै थियो, त्यसैले अधिकांश सामग्रीको इन्स्योरेन्स भएको छैन’, कार्कीले भने ।

अध्यक्ष कार्कीको भनाइअनुसार अधिकांश बाढीमा बगेका सामग्रीको इन्स्योरेन्स दाबी व्यवसायीले गर्नसक्ने अवस्था छैन । तर, सवारी चालकहरू र मालबाहक गाडीको भने इन्स्योरेन्स हुने उनले बताए ।

अध्यक्ष कार्कीले यतिबेला केरुङ क्षेत्रसम्म आइपुगेका सयौँको संख्याका मालबाहक सवारी साधन अलपत्र परेको र ती नेपालसम्म कसरी ल्याइपुर्‍याउने भन्ने पनि चिन्ता थपिएको बताए । उनले तातोपानी नाका विकल्प भएपनि सहज नभएको भन्दै कोरला पुर्‍याएर ल्याउन कम्तिमा एकहप्ता बढी समय लाग्ने बताए । जसले गर्दा निकै खर्चिलो हुने पनि उनको भनाइ छ ।

‘हामीलाई तातोपानी नाका सहज हुने हो भने सजिलो हुन्छ, जहाँबाट दैनिक ठूलो संख्यामा ट्रक ल्याउन सकिन्छ, तर, कोरला जानुपर्ने अवस्थामा एकै ट्रक सामग्री ल्याउनको लागि ५-६ दिन बढी समय लाग्छ’, उनले भने ।

साथै, अब चिसो मौसम बढ्न लागेकाले सो क्षेत्रमा सवारी साधनहरू बन्द गरेर राख्दा पुर्न सुचारु हुन समस्या हुने पनि उनले बताए ।

कार्कीका अनुसार अहिले नै कतिपय फलफूल बोकेर आएका मालबाहक ट्रकमा सामग्री बिग्रन लागिसकेको र आइतबार मात्रै एक ट्रक ड्रागन फ्रुट निकालेर केरुङ क्षेत्रमा बाँडिएको बताए ।