काठमाडौं– भोटेकोशीमा आएको विनाशकारी बाढीको उच्च नकारात्मक प्रभाव सेयर बजारमा देखिएको छ । शुक्रबार झिनो अंकले घटेको नेपाल स्टक एक्सचेञ्ज (नेप्से) सोमबार भने ४३.८९ अंकले घट्न पुग्यो।

सोमबार नेप्सेमा ३ अर्ब ६४ करोड ८६ लाख ९ हजार रुपैयाँको कारोबार हुँदा नेप्से घटेर २५१३.४२ बिन्दुमा पुगेको हो । सोमबार उच्च अंकले नेप्से घट्दा नेप्सेको कुल पुँजीकरण पनि १.७१ प्रतिशतले घटेको छ ।

सोमबार कारोबार भएकामध्ये २५३ वटा कम्पनीको सेयर मूल्य घट्यो भने २१ वटा कम्पनीको मात्रै सेयर मूल्य बढ्यो । तर, आज ४ वटा कम्पनीको सेयर मूल्य भने स्थिर रह्यो ।

निर्जीवन बीमा समूहमा उच्च गिरावट

समूहगत आधारमा हेर्दा सोमबार नेप्सेमा उत्पादन तथा प्रशोधन समूह बाहेक सबै समूहको उपसूचकमा गिरावट आयो । जसमध्ये निर्जीवन बीमा उपसमूहमा सबैभन्दा धेरै अर्थात् ४९०.०६ बिन्दुले गिरावट आएको छ ।

उच्च अंकले गिरावट आउँदा सोमबार निर्जीवन बीमा उपसमूहको कुल पुँजीकरण पनि ५.०३ प्रतिशतले घटेको देखिन्छ ।

त्यस्तै, सोमबार होटेल तथा पर्यट समूहको उपसूचक १७४.८७, हाइड्रोपावर समूहको उपसूचक १०४.३६ र जीवन बीमा समूहको उपसूचक २२२.३१ अंकले घट्न पुग्यो ।