काठमाडौं – गृहमन्त्री सुधन गुरुङ सिरहाको लहान पुगेका छन् । मधेसका विभिन्न जिल्लामा उत्पन्न तनावपूर्ण अवस्थाको स्थलगत अनुगमन तथा सुरक्षा अवस्थाबारे जानकारी लिन उनी विराटनगरबाट सप्तरी हुँदै लहान पुगेका हुन् ।

लहानमा गृहमन्त्री गुरुङले मधेस प्रदेशमा कार्यरत सुरक्षा निकायका प्रमुख, स्थानीय राजनीतिक दलका प्रतिनिधि तथा जनप्रतिनिधिसँग सुरक्षा अवस्था, शान्ति स्थापना र आगामी रणनीतिबारे छलफल गरिरहेका छन् ।

बिहीबार लहानमा प्रदर्शन भएको थियो । त्यसअघि सिरहाको गोलबजारमा दुई पक्षबीच भएको झडपमा औरही गाउँपालिका–२ का १८ वर्षीय गणेश यादवको मृत्यु भएपछि अवस्था थप तनावग्रस्त बनेको थियो ।

हिन्दु र मुस्लिम समुदायबीचको तनाव बढेसँगै सिरहासहित धनुषा र पर्सा जिल्लाका विभिन्न क्षेत्रमा स्थानीय प्रशासनले कर्फ्यु आदेश जारी गरेको छ । सुरक्षा संवेदनशीलतालाई मध्यनजर गर्दै नेपाल प्रहरी, सशस्त्र प्रहरी र अन्य सुरक्षा निकायको परिचालनसमेत बढाइएको छ ।

गृहमन्त्री गुरुङले स्थानीय प्रशासन र सुरक्षा निकायलाई शान्ति–सुरक्षा कायम गर्न कुनै कसर बाँकी नराख्न निर्देशन दिएका छन् । साथै, सबै पक्षलाई संयम अपनाउँदै अफवाहमा विश्वास नगर्न र सामाजिक सद्भाव कायम राख्न आग्रह गरिएको छ ।