काठमाडौं– बलिउड अभिनेत्री शिल्पा शेट्टी शुक्रबार काठमाडौं आइपुगेकी छन् । अभिनेत्री शिल्पा नेपालमा पहिलो पटक आयोजना हुन लागेको ‘ईएमएफ एसीई ग्लोबल कन्भेन्सन एन्ड अवार्ड २०२६’ मा विशेष अतिथिका रूपमा सहभागी हुन आएकी हुन् । 

त्रिभुवन अन्तर्राष्ट्रिय विमानस्थलमा अवतरण गरेलगत्तै आयोजक टोलीले उनको भव्य स्वागत गरेको थियो।  काठमाडौंस्थित सोल्टी होटलमा भइरहेको यो अन्तर्राष्ट्रिय सम्मेलन आइतबारसम्म सञ्चालन हुनेछ ।

भारतको इभेन्ट व्यवस्थापक महासंघ ले आफ्नो १३औँ संस्करणको वार्षिक सम्मेलन पहिलो पटक नेपालमा आयोजना गरेको हो । 

आयोजकका अनुसार कार्यक्रममा भारतसहित सात देशका करिब ५५० जना इभेन्ट, वेडिङ, पर्यटन तथा आतिथ्य क्षेत्रका व्यवसायी, लगानीकर्ता र गन्तव्य विशेषज्ञ सहभागी हुँदैछन् । सम्मेलनले नेपाललाई अन्तर्राष्ट्रिय इभेन्ट र पर्यटन गन्तव्यका रूपमा प्रवर्द्धन गर्ने अपेक्षा गरिएको छ ।

कार्यक्रममा शिल्पा शेट्टीसँगै बलिउड अभिनेता शक्ति कपुर र विक्रान्त मेसी पनि सहभागी हुने जनाइएको छ । यस्तै, चर्चित बलिउड अभिनेत्री मनीषा कोइरालाको पनि विशेष उपस्थिति रहने आयोजकले जनाएको छ ।