जनकपुरधाम– जिल्ला प्रशासन कार्यालय धनुषाले जिल्लामा बिहीबार जारी गरेको कर्फ्यु शुक्रबार बिहानका लागि केही खुकुलो बनाएको छ । सर्वसाधारणको सुविधाका लागि प्रशासनले आज बिहान ६ देखि ८ बजेसम्मका लागि दुईघण्टा कर्फ्यु खुकुलो पारिएको जनाएको छ ।

प्रमुख जिल्ला अधिकारी प्रेम प्रसाद लुइटेलले एक सूचना जारी गर्दै दैनिक उपभोग्य वस्तु खरिद गर्नका लागि बिहान दुई घण्टा कर्फ्यु खुकुलो पारिएको जानकारी दिएका छन् ।

यस अवधिमा सर्वसाधारणले दूध, तरकारी, फलफूल, खाद्यान्न लगायतका अत्यावश्यक वस्तुहरू खरिद गर्न पाउनेछन् । प्रशासनले निर्धारित समयभित्रै सामान खरिद गरी आफ्नो निवासमा फर्किसक्न अनुरोध गरेको छ । सूचनामा अन्य समयमा कर्फ्युको पूर्ण पालना गर्न सबैमा अनुरोध गरिएको छ ।

कर्फ्युको समयमा अत्यावश्यक सेवा नियमित सन्चालन हुने र स्वास्थ्यकर्मी, कर्मचारी, सञ्चारकर्मी र रेडक्रस, तिर्थयात्री, बिरामी व्यक्तिहरुलाई परिचयपत्रको आधारमा आउजाउ गर्न दिइने प्रशासनले जनाएको छ ।