काठमाडौं– नेपाली कांग्रेसका महामन्त्री गुरु घिमिरेले सरकारको सय दिने कार्यकाल उपलब्धिमूलक नभई प्रचारमुखी र स्टन्टबाजीमा केन्द्रित रहेको आरोप लगाएका छन् । खबरहबसँगको कुराकानीमा उनले बहुमतको सरकारले जनताले प्रत्यक्ष अनुभूति गर्ने गरी काम गर्न नसकेको दाबी गरे ।

‘प्रधानमन्त्री संसदप्रति जवाफदेही हुनुपर्छ । संघीय लोकतान्त्रिक प्रणालीमा संसदले नै प्रधानमन्त्री बनाउँछ र हटाउँछ पनि,’ उनले भने । यस्तै, प्रधानमन्त्री वालेन्द्र शाह संसदमा उपस्थित नहुने गरेकोमा पनि उनले असन्तुष्टि जनाए । यसका साथै राष्ट्रपति रामचन्द्र पौडेलले सदनमा नीति तथा कार्यक्रम प्रस्तुत गर्दै गर्दा बीचमै प्रधानमन्त्री हिँडेको भन्दै आपत्ति जनाए ।

‘उहाँले संसद छलेर जनताको बहुमतको अपमान गर्ने काम गर्नुभएको छ । सरकारका निर्णयले गरिखाने वर्गलाई अझ पोलेको देखिन्छ । यसमा कांग्रेसको आपत्ति छ,’ उनले भने । यस्तै, सरकारका जनहित विरुद्धका निर्णयमा कांग्रेसले सदनदेखि सार्वजनिक फोरमहरुमा आवाज उठाएको महामन्त्री घिमिरेले दाबी गरे ।

‘सरकारले गलत निर्णय गर्दा कतै कांग्रेसका संसदीय दलका नेताले उठाउनुभएको छ । कतै प्रमुख सचेतक, सचेतक, कतै सांसदहरुले उठाउनुभएको छ,’ उनले थपे, ‘पार्टी बाहिरका फोरममा सभापति स्वयं पनि बोलनुभएको छ । पदाधिकारी साथीहरु बोल्नुभएको छ । हामी बोलेका छौँ,’ महामन्त्री घिमिरेले भने ।

सरकारको सुरुवाती तीन महनिाको निर्णय स्टन्टबाजी र प्रोपागाण्डा उन्मुख रहेको भन्दै महामन्त्री घिमिरे भन्छन्, ‘बहुमत सरकारले देश विकास गरोस् भन्ने चाहना कांग्रेसको समेत छ । तर, सरकार र मन्त्रीहरूको काम जनताको दैनिक जीवन सहज बनाउनेभन्दा स्टन्टबाजीमा केन्द्रित देखिन्छ ।’

त्यसैले सरकारको कामबाट जनतामा उत्साह नरहेको उनको भनाइ छ। घिमिरेले सरकार लोकतन्त्र र राष्ट्रिय सार्वभौमसत्तामाथि नै लापरवाही ढंगले अघि बढिरहेको आशंका समेत व्यक्त गरे । सीमाना, संविधान, स्थानीय तहलाई दलविहीन बनाउने प्रयास तथा प्रत्यक्ष निर्वाचित प्रधानमन्त्रीको अवधारणाजस्ता विषयमा सरकार अलोकतान्त्रिक दिशातर्फ उन्मुख भएको उनको आरोप छ ।