काठमाडौं – वरिष्ठ अधिवक्ता टीकाराम भट्टराईले पपुलिजमको उत्कर्षको अवस्थामा न्यायालयमाथि अत्यधिक भरोसा नगर्न राजनीतिक दलहरूलाई आग्रह गरेका छन् ।

उनले विशेषगरी नेपाली कांग्रेस र नेकपा एमाले लगायत प्रतिपक्षी दलहरूलाई राष्ट्रिय स्वाधीनता र लोकतन्त्रको लडाइँ एकसाथ लड्न तयार रहन आह्वान गरेका छन् ।

भट्टराईले उक्त लडाइँ लामो हुन सक्ने उल्लेख गर्दै प्रतिपक्षी दलहरूले पहिले आफ्नै संगठन सुदृढ बनाउनुपर्ने बताएका छन् । उनले भ्रष्ट, अनैतिक र विवादित व्यक्तिहरूलाई जिम्मेवारीबाट हटाएर राजनीतिक घर बलियो बनाउनुपर्ने धारणा व्यक्त गरे ।

उनले पपुलिजमको उत्कर्षमा नागरिक अधिकार, प्रेस स्वतन्त्रता र लोकतान्त्रिक स्पेस संकुचित हुने जोखिम बढ्ने भएकाले यसप्रति सचेत रहनुपर्ने आवश्यकता रहेको बताएका छन् । भट्टराईले यस्तो अवस्थामा लोकतन्त्र र राष्ट्रिय स्वाधीनताको रक्षा गर्न प्रतिपक्षी दलहरूबीच सहकार्य अपरिहार्य हुने बताएका छन् ।

पछिल्लो समय बालेन शाह नेतृत्वको सरकारले दलका नेताहरूमाथि एकपछि अर्को धरपकड गरिरहेको छ । १८२ सिटसहित दुईतिहाइ बहुमतनजिक रहेको सरकारले आफूलाई इतिहासमै लोकप्रिय भनिरहेको छ । यही सन्दर्भमा भट्टराईले पुराना दलहरूलाई लामो लडाइँको लागि तयार रहन भनेका हुन् ।