काठमाडौं – पछिल्लो तीन वर्षदेखि फिल्मको काम नपाएका नायक आकाश श्रेष्ठले ‘आबाट आमा २’ साइन गरेका छन् ।

उनी फिल्ममा अनुबन्ध भएको निर्देशक चन्द्र पन्तले सोमबार जानकारी दिएका हुन् ।

यससँगै ‘आबाट आमा २’का लागि तीन कलाकार फाइनल भएका छन् । सिक्वेलमा नायक पल शाह र नायिका विपना कार्कीलाई निरन्तरता दिइएको हो ।

निर्देशक पन्तका अनुसार पल शाह फिल्ममा शीर्ष भूमिकामा रहेका छन् । आकाश विशेष भूमिकामा अनुबन्ध भएका हुन् ।

पन्तले भने, ‘हामीले फिल्मको कथा अनुसार नै आकाशलाई अनुबन्ध गरेका हौँ ।’

उनको भूमिकाबारे निर्माण पक्षले थप केही खुलाएको छैन ।

लगातार फिल्महरू फ्लप भएपछि आकाश सन् २०२३ देखि कुनै पनि फिल्ममा देखिएका छैनन् । उनी भने राम्रो स्क्रिप्टको खोजीमा आफू रहेको बताउँदै आएका छन् ।

वैशाख २ बाट यो फिल्मको छायाङ्कन सुरु हुने र दशैँमा प्रदर्शनमा आउने बताइएको छ ।

‘आबाट आमा’ अहिले प्रदर्शनरत छ । ५१ दिन मनाएको यस फिल्मले १३ करोडभन्दा बढी व्यापार गरेको छ ।