काठमाडौं– श्रम संस्कृति पार्टीका अध्यक्ष हर्क साम्पाङले सामाजिक सञ्जालमार्फत ज्यान मार्ने तथा घर जलाउने धम्की आएको भन्दै नेपाल प्रहरी साइबर ब्युरो मा उजुरी दर्ता गरेका छन्।

अध्यक्ष साम्पाङका अनुसार ‘सुनिता खड्का’ नामको टिकटक आइडीबाट आफू र आफ्नो परिवारलाई लक्षित गरी ज्यान मार्ने तथा घरमा आगजनी गर्ने धम्की दिइएको छ। साथै फेसबुक र टिकटक जस्ता सामाजिक सञ्जालमा अपशब्द प्रयोग गर्दै गालीगलौज गरिएको र समाजमा भ्रम फैलाउने काम भएको उहाँले उल्लेख गरेका छन्।

‘म लगायत मेरो घरपरिवारलाई ज्यान मार्ने धम्की दिएको, घर जलाउने धम्की दिई सामाजिक सञ्जालमा अपशब्द प्रयोग गरी गालीगलौज गर्दै समाजमा भ्रम फैलाएको हुँदा प्रचलित कानून बमोजिम हदैसम्मको कारवाही गरिपाऊँ,’ अध्यक्ष साम्पाङले उजुरीमा उल्लेख गरेका छन् ।

उजुरीका आधारमा साइबर ब्युरोले घटनाबारे आवश्यक अनुसन्धान सुरु गरेको जनाएको छ।