सिरहा – प्रतिनिधिसभा निर्वाचन सिरहा क्षेत्र नं.२ मा राष्ट्रिय स्वतन्त्र पार्टी (रास्वपा) र प्रगतिशील लोकतान्त्रिक पार्टी (प्रलोपा) बीच चुनावी सहकार्य गर्ने सहमति भएको छ।

दुवै पार्टीले संयुक्त रूपमा जारी गरेको जानकारीअनुसार जनताको हित, सुशासन, लोकतान्त्रिक मूल्य–मान्यता तथा परिवर्तनमुखी राजनीतिक अभ्यासलाई मजबुत बनाउने उद्देश्यसहित यो सहकार्य गरिएको हो।

यस सहकार्यअनुसार प्रतिनिधिसभा निर्वाचनमा प्रत्यक्षतर्फ राष्ट्रिय स्वतन्त्र पार्टीका उम्मेदवार शिव साद यादवलाई समर्थन गर्ने निर्णय गरिएको छ। सहमतिअनुसार मतदातालाई चुनाव चिह्न ‘घण्टी’ मा मतदान गर्न अनुरोध गरिएको छ।

त्यस्तै, समानुपातिकतर्फ भने प्रगतिशील लोकतान्त्रिक पार्टीका उम्मेदवार तथा पार्टीको चुनाव चिह्न ‘खुलेको एकल आँखा’ मा मतदान गर्न प्रलोपाले आफ्ना नेता, कार्यकर्ता, समर्थक तथा शुभचिन्तकलाई आग्रह गरेको छ।

दुवै पक्षले यो सहकार्य जनताको अपेक्षाअनुसार राजनीतिक स्थिरता, पारदर्शिता र जवाफदेहिताको दिशामा केन्द्रित रहने विश्वास व्यक्त गरेका छन् । उक्त सहकार्यसम्बन्धी सहमतिपत्रमा शिव यादव र अरविन्द कुमार यादवले हस्ताक्षर गरेका छन्।