सर्लाही- सर्लाही क्षेत्र नम्बर ४ मा राष्ट्रिय स्वतन्त्र पार्टीका उम्मेदवार डा. अमरेशकुमार सिंहले यस पटकको निर्वाचन जीवनकै सबैभन्दा ठूलो मतान्तरसहित जित्ने दाबी गरेका छन् ।

आफ्नो निर्वाचन क्षेत्रमा प्रचारप्रसारका क्रममा सञ्चारकर्मीहरूसँग कुराकानीका क्रममा उनले नेपाली कांग्रेसका सभापति गगनकुमार थापासमेत मैदानमा रहेको सर्लाही ४ मा आफ्नो जित पक्का रहेको बताएका हुन् ।

थापाले माहोल बढाउँदै लगेको अवस्थामा सिंहले आफूले जीवनकै सबभन्दा ठूलो मतले चुनाव जित्ने आत्मविश्वास मतदातालाई सुनाउँदै आफूतिर तान्ने कोसिस गरेका हुन् ।

उनले यसपटक रास्वपाले एक्लै १६० सिट जित्ने दाबी गरेका छन् । मधेश प्रदेशबाट ३२ मा २० सिट रास्वपा एक्लैले जित्ने जिकिर उनको छ । समानुपातिकतर्फ पनि रास्वपा पहिलो दल हुने उनले बताए ।

‘अहिलेसम्म जिन्दगीमा मैले जति अन्तरले चुनाव जित्दै आएको थिएँ, त्योभन्दा बढी मत ल्याएर जित्नेमा विश्वस्त छु’, उनले भने ।

यो निर्वाचनमा कांग्रेसले २० देखि २५ सिट जिते पनि त्यो धेरै ठूलो कुरा हुने सिंहले दाबी गरे । उनले बालेन्द्र साहको नेतृत्वमा रास्वपाले एक्लैले १६० सिटभन्दा बढी जित्ने ठोकुवा गरे ।

‘मधेश प्रदेशमा प्रतिनिधि सभाका ३२ सिट छन्, त्यहाँबाट रास्वपाले एक्लै २० सिट जित्छ’, उनले भने, ‘समानुपातिकमा पनि सबभन्दा बढी भोट रास्वपाले ल्याउँछ । अहिले मधेशी समूदायका लागि सत्ता परिवर्तन जरूरी भइसकेको छ।’