काठमाडौं– त्रिपुरेश्वरमा भएको सवारी आगजनीको घटनामा मृत्यु भएका बस चालक अर्जुन दोङका परिवार न्याय माग्दै सिंहदरबार पुगेका छन् ।  

आफ्ना छोराको लागि न्याय माग्दै अर्जुनका आमा माइली माया दोङ लगायत उनकी श्रीमती बुधबार सिंहदरबार दक्षिण गेट अगाडी पुगेका हुन् । 

उनीहरुले अर्जुनलाई आगजनीको घटना घटाउन बाध्य पर्नेलाई कानूनी कारबाही हुनुपर्ने माग राखेका छन् । अर्जुनकी आमा माइली माया दोङले छिटोभन्दा छिटो न्याय पाउनुपर्ने र घटनामा संलग्न दोषीहरूमाथि कडा कानुनी कारबाही हुनुपर्ने माग राख्दै निरन्तर धाइरहनु परेको बताइन् । 

उनले छोरालाई अरूको भरमा गाडी नचलाउन र घर आएर नागरिकता बनाउन बारम्बार आग्रह गरेको बताइन् । 

असोज ५ गते रिद्धिसिद्धी यातायातको बा ५ ख ४२७४ नम्बरको बसमा त्रिपुरेश्वरमा आगलागी भएको थियो । आगलागी लगत्तै दमकलको सहायताले आगो नियन्त्रणमा लिइए पनि ९० प्रतिशतभन्दा बढी शरीर जलेका चालक दोङको उपचारकै क्रममा मृत्यु भएको थियो ।