काठमाडौं– राष्ट्रिय स्वतन्त्र पार्टी (रास्वपा)का सांसद मनीष झाले बाढीपहिरोका क्रममा नदी तथा जंगलबाट बगेर आउने बालुवा र काठको उचित व्यवस्थापन गर्न सम्बन्धित निकायको ध्यानाकर्षण गराएका छन् ।

बुधबारको प्रतिनिधिसभा बैठकमा बोल्दै उनले प्रकृति मानवका लागि वरदान भए पनि त्यसको उचित व्यवस्थापन गर्न नसके विपत्तिको कारण बन्न सक्ने बताए ।

हालैको बाढीपहिरोका क्रममा पहाडी क्षेत्रबाट बगेको ठूलो परिमाणको बालुवा तराईका नदी तथा बस्ती क्षेत्रमा पुगेको र कतिपय नदीमा पानीभन्दा बढी काठ बगेको उनले उल्लेख गरे ।

‘नदीमा बालुवा धेरै जम्मा हुँदा बस्तीमा पुग्न थालेको छ । काठ व्यवस्थापन गर्न नसक्दा कतिपय नदीमा पानीभन्दा बढी काठ बगेको देखियो,’ उनले भने ।

नेपालले मलेसियालगायतका देशबाट काठ आयात गरिरहेको उल्लेख गर्दै झाले बाढीले बगाएर ल्याएको काठ र बालुवालाई उचित व्यवस्थापन गर्न सम्बन्धित निकायले तत्काल ध्यान दिनुपर्ने बताए ।