भक्तपुर– सूर्यविनायक नगरपालिकाले भोटेकोशी बाढी प्रभावित नागरिकको उद्धार, राहत तथा पुनः स्थापनाका लागि प्रधानमन्त्री दैवी प्रकोप उद्धार कोषमा ५५ लाख ५५ हजार ५५५ रुपैयाँ जम्मा गर्ने निर्णय गरेको छ ।

नगर प्रमुख वासुदेव थापाको अध्यक्षतामा आज बसेको नगरपालिकाको २१५औँ कार्यपालिका बैठकले स्थानीय विपद् व्यवस्थापन कोषबाट उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो ।

नगर प्रमुख थापाले भोटेकोशी बाढीबाट रसुवा, नुवाकोटलगायत जिल्लामा ठूलो जनधनको क्षति भएकाले विपद्को यस घडीमा प्रभावित नागरिकको उद्धार, राहत तथा पुनः स्थापनामा सहयोग पुर्‍याउन नगरपालिकाले उक्त रकम उपलब्ध गराउने निर्णय गरेको बताए ।

उनले राष्ट्रिय विपद्को यस घडीमा मानवीय दायित्व बहन गर्दै आफ्नो क्षेत्रबाट सहयोग गर्न नागरिक समाज, निजी क्षेत्र तथा सङ्घसंस्थालाई आग्रह गरे ।

नगरपालिकाका प्रवक्ता एवं वडा नं ७ का वडाध्यक्ष रवीन्द्र सापकोटाका अनुसार राहत कोषमा नगर प्रमुखको तर्फबाट ३५ हजार, उपप्रमुखको तर्फबाट १५ हजार, वडाध्यक्षहरूको तर्फबाट प्रतिव्यक्ति १० हजारका दरले एक लाख, कार्यपालिका सदस्यहरूको तर्फबाट प्रतिव्यक्ति छ हजार तथा वडा सदस्यहरूको तर्फबाट प्रतिव्यक्ति दुई हजार ५०० रुपैयाँका दरले रकम उपलब्ध गराउने निर्णय गरिएको छ ।