काठमाडौं- प्रहरीले गत आइतबार सुनसरीको देवानगञ्जमा अपनाएकै तरिकाको प्रयोग सिरहाको गोलबजारमा पनि गरेको छ।

गोलबजारमा बिहीबार दिउँसो मारिएका २० वर्षीय गणेश यादवको घाँटीमै गोली लागेको पाइएको छ।

गोलबजारमा गोली लागेर मृत्यु भएका तुल्सीपुरका गणेशको घाँटी गोलीले वारपार छेडेको छ । गोली लागेर सडकमै ढलेका उनको त्यहीँ निधन भएको हो ।

उक्त घटनामा गोली लागेर घाइते भएका अर्का युवक सुवास ठाकुरलाई उपचारका लागि बीपी कोइराला स्वास्थ्य विज्ञान प्रतिष्ठान धरान लगिएको छ।

गोलबजार क्षेत्रमा दुई समुदायबीच बढेको तनाव नरोकिने देखिएपछि प्रहरीले गोली चलाउँदा एकजना गणेको ज्यान गएको थियो । उनको शव अहिले स्थानीय अस्पतालमा राखिएको छ।

प्रहरीले हानेको गोली लागेर अन्य केही व्यक्ति गम्भीर घाइते भएका छन् । यसअघि सुनसरीको देवानगञ्जथित कप्तानगञ्जमा मृत्यु भएका दुईजना र अन्य घाइते ८ जनाको कम्मरभन्दा माथि गोली लागेको थियो ।

सुनसरीको कप्तानगञ्जबाट आइतबार रातिदेखि फैलिएको तनाव मधेश प्रदेशतिर सर्दै गर्दा भौतिक र मानवीय क्षति हुन थालेको छ। गोलबजार र लहानका कयौँ होटल र व्यापारिक प्रतिष्ठानमा तोडफोड भएको छ।

गोलबजारमा बिहीबार पार्किङमा राखिएका ११ वटा मोटरसाइकलमा आगजनी गरिएको छ । सडकमा राखिएका कयौँ बस र अन्य साधन पनि तोडफोड गरिएको छ। गोलबजारमा अहिले कर्फ्यु लागेको छ।