काठमाडौँ– राष्ट्रिय स्वतन्त्र पार्टी (रास्वपा) का नेता तथा प्रतिनिधिसभा सदस्य डा. अमरेश कुमार सिंहले मधेसको समुन्नत विकासका लागि सबै वर्ग र समुदाय मिलेर अगाडि बढ्नुपर्ने बताएका छन् ।

पछिल्लो समय मधेसमा देखिएका विभिन्न हिंसात्मक गतिविधि र अशान्तिप्रति लक्षित गर्दै उनले सामाजिक सञ्जाल फेसबुकमार्फत उनले पटक–पटकका आन्दोलन, जातीय र धार्मिक हिंसाले मधेसलाई दशकौँ पछाडि धकेल्ने उल्लेख गरेका छन् । साथै उनले हिंसा र जातीय द्वन्द्वले कसैको भलो नगर्ने जनाएका छन् ।

सांसद सिंहले पटकपटकका आन्दोलन, जातीय तथा धार्मिक द्वन्द्वलगायत गतिविधिले मधेसको भौतिक संरचना भत्काउने, शैक्षिक सत्र अवरुद्ध हुने र व्यापार–व्यवसाय ठप्प हुने जस्ता समस्या पैदा गरेर मधेसमैथि नै ठूलो धक्का पुर्याउने गरेको स्पष्ट पारेका छन् ।

सांसद सिंहले शान्ति विरोधी तत्त्व जुनसुकै समुदाय वा वर्गको भए पनि उनीहरू मधेसको विकासको विरोधी भएको ठहर गर्दै त्यस्ता व्यक्तिहरूलाई सामाजिक बहिष्कार गर्नुपर्ने बताएका छन् ।

उनले समाजको शान्ति र सद्भाग खलबल्याउन खोज्ने व्यक्तिका पछाडि नलागि हिंसात्मक गतिविधि त्यागेर शिक्षा, स्वास्थ्य, भौतिक पूर्वाधार, कृषि र युवाको रोजगारीमा दीर्घकालीन विकासका लागि एकढिक्का हुनुपर्नेमा जोड दिएका छन् ।

उनले लेखेका छन्– ‘म सम्पूर्ण मधेशवासी आमा बुवा दाजुभाइ दिदिबहिनी मा अपिल गर्न चाहन्छु कुनैपनि असमाजिक तत्व जस्ले एकजुट भएर बसेको समाजको शान्ति, सद्भाव खलबलाउने व्यक्तिको पछाडि नलाग्न अनुरोध गर्दछु। त्यस्ता गतिविधि गर्ने जुनसुकै सामुदाय या वर्गको भए पनि त्यो मधेसको विकासको विरोधी हो र त्यास्तालाई समाजिक वहिष्कार गर्नुपर्छ।’