काठमाडौं- नेपाली कांग्रेसका सभापति गगनकुमार थापाले खेतमा रोपिएको प्रत्येक धानका बिरुवासँग किसानका सपना, परिवारको भान्सा, देशको भविष्य र राष्ट्रको समुन्नति जोडिएको बताएका छन् ।

राष्ट्रिय धान दिवसको अवसरमा सोमबार शुभकामना सन्देश जारी गर्दै सभापति थापाले खेतमा पसिना बगाएर देशको खाद्य सुरक्षा सुनिश्चित गर्ने अन्नदाता किसानप्रति सम्मान र आभार व्यक्त गरेका हुन्।

उनले असार १५ केवल धान रोपाइँ गर्ने दिन मात्र नभई नेपाली किसानको श्रम, सङ्घर्ष, आशा र आत्मनिर्भरताको उत्सव भएको उल्लेख गरेका छन् ।

शुभकामना सन्देशमा उनले देशको मुख्य खाद्यान्न बाली धान भएकाले यसको उत्पादकत्व वृद्धि गर्नु केवल कृषि कर्ममा सीमित विषय नभई नागरिकको खाद्य सुरक्षाको सुनिश्चितता र संविधानको मर्मअनुसारको दायित्वसमेत भएको बताएका छन् ।

सभापति थापाले कृषि उत्पादन वृद्धि, किसानको सम्मान र आत्मनिर्भर अर्थतन्त्र निर्माणका लागि राज्य, निजी क्षेत्र र आम नागरिकबीच सहकार्य आवश्यक रहेको उल्लेख गर्दै राष्ट्रिय धान दिवसले कृषिप्रति सम्मान र उत्पादन वृद्धि गर्ने प्रेरणा प्रदान गरोस् भन्ने शुभकामना व्यक्त गरेका छन् ।